Samajwadi Party chief Akhilesh Yadav chuan eptu pawl, INDIA tangrualin kum 2027-a Uttar Pradesh assembly inthlan lo awm tur chu a huhovin an chuh dawn tih Pathianni khan a puang.
Yadav-a hian BJP chu Waqf (Amendment) Bill hmanga mafia ang maia mi ram neihsak tumah a puh.
Thuthar lakhawmtute a kawmnaah Yadav-a chuan, “PDA (backward, Dalits leh hnam leh sakhaw tlem zawk)-ten an state-ah BJP chu kum 2027 assembly inthlanah hian an phet thlu dawn,” a ti.
INDIA tangrual chungchang zawhna chhangin, “INDIA hi a awm mek a, a awm zel dawn,” tiin kum 2024 inthlanpui neih dawna din pawl chhunga neuh neuh awm anga sawina chu a pha.
“BJP hian Waqf Amendment Bill pharhin ram an neih theih dan tur an siam a. Ram kan hmuh theih apiangin an luah a ni,” tiin ‘land mafia party’ tiin a sawi.
Rorel lai party chuan mipuite sum pawh pawisa tlang lian tihthih hmang leh GST hmangin an ‘chhuhsak’ niin a puh bawk.
Yadav-a hian BJP sorkarin Prayagraj-a Maha Kumbh an dawnsawn dan pawh sawiselin thuneihna an chan hunah ‘an inruahmanna felhlelh dan leh kal dan dik lohna’ chu an chhui ngei tur thu a sawi.
SP chief hian sorkar khan Hindu sakhaw punkhawmna liana chhiatna thlenga thi zat dik tak leh suma a hlawkna dik tak a puang lo niin a sawi a. January thlaa mipui innek buaina thlengah pawh khan drone an thlawhtir leh CCTV surveillance an dah chuan engmah hna a thawk lo niin a sawi.
“Drone leh CCTV kan mamawh lai tak khan hman theih loh turin an tithi vek a ni,” tiin a sawi.
Yadav-a hian kha innek buaina thlenga thi chhungte kha sorkar chuan an thih chhan sawi dan thlak turin a nawr bawk niin a sawi.
Yadav-a hian amah kawmtu chanchinbumite hnenah hian social media-a dah chhuah Prayagraj Maha Kumbh 2025 atana rawtna awmte booklet-a siam leh Harvard University-in kum 2013 Prayagraj Kumbh Mela an zir chianna a pe.
Uttar Pradesh chief minister hlui hi Prayagraj-ah hian SP state president Shyam Lal Pal-a fanu neihnaa tel turin a kal a ni.