Aizawl: Toyota Kirloskar Motor Private Limited in CSR kaltlangin Mizoram sorkar hnenah JCB pahnih leh automatic number plate reader 34 an hlan.
Nimin khan Chief Minister Office tualah Toyota Kirloskar Company-a Executive Vice President and Country Head Vikram Gulati-a’n chief minister Lalduhoma hnenah he’ng khawlte hi a hlan.
Hemi hnua CMO Conference Hall-a inkhawm buatsaihah Chief Minister Lalduhoma chuan Toyota Kirloskar Company chu Mizoram tan an lo luang chhuak tawh thin avangin lawmawm a tih thu a sawi a. Tun tumah pawh hian disaster management lama hman theih hmanraw to tham, tangkai bawk si an neih belh chu lawmawm a tih thu leh tangkai taka hman a nih tur thu a sawi a. Aizawl Traffic Management tihchangtlunna tura an thilpek avangin lawmthu a sawi bawk.
Vikram Gulati, Executive Vice President and Country Head pawhin thu sawiin, Mizoramin leilung chhiatna a tawh thu an hriat thin thu a sawi a. Tih theih tam tak nei lo mah se, heng chhiatna a lo thlen palh changa chhanchhuahna leh tanpuina hnathawhna lama hman tur, an tha tichaktu tura an rin JCB hi sorkar pek tha tiin, lawm taka an hlan thu a sawi.
He mi hnu hian JCB pahnih inhlan thua inremna Memorandum of Agreement chu chief minister hnenah a hlan a ni.