Kolasib District Magistrate Robert C Lalhmangaiha’n Thingdawl Polytechnic building-a dan lova Myanmar atanga kuhva phurh man dahkhawmte chu district magistrate thuneihna anga lilam (auction) hmanga tihral a nih thu a sawi.
Kuhva tihral a nih chungchanga tun hnaia social media-a thehdarh chungchang chu nimin khan Kolasib Bawrhsap Robert C Lalhmangaiha chuan a pisa-ah a sawi fiah a. Hengte hi kum 2022 chho vel atanga man tawh a nih thu sawiin tihral tumna chungchanga thu dik ziktluak hre chiang lova social media-a thu thehdarh a ni chu pawi a tih thu a sawi.
Robert C Lalhmangaiha chuan dan lova kuhva tawlh mankhawm, Kolasib district court-in a chungthu a rel tawh chu Kolasib district chhung leh Kolasib khawpui chhung hmun eng emaw zatah dah a ni a. A tam ber chu Polytechnic Building, Thingdawl-ah dah a nih thu a sawi a. He Polytechnic building hi Higher & Technical Education Department hnuaia awm niin tun hunah hian sak that leh thawm that tura ruahman a ni a. Building chung hi a pawp nasat avangin a chhunga kuhva dah hi a chhe nasa tawhin kuhva rihna chuan building himna hi a tiderthawng niin a sawi.
Kuhva man sa leh an chungchang rel fel tawh, district court-in district magistrate kuta tihral tura a dah fel tawhte hi a tihral dan tur chungchangah district administration leh police-in phum bo emaw, hal ral emaw, paih emaw, CrPC leh dan thar BNSS-a district magistrate thuneihna angin hralh emaw an ngaihtuahin a tha ber tur an zawng tih a sawi.
Kolasib nawrhsap chuan kuhva man sa tihral dan turah phum bo turin hmun a awm loh bakah hal ral a nih chuan sum tam tak sen a ngaih dawn bakah environmental issue nasa tak a awm thei dawn a. Thehthanga paih darh hian mi thenkhat lo chhar khawma sumdawnna atana hman tum an awm leh thei tih zawng zawng ngaihtuah hian kuhva chhia leh hlui, a dahna hmun tihruah ngai bawk si a nih avangin dan tlawhchhana a lei thei tur hnena tihral mai hi district magistrate chuan a thuneihna angin tha a tih hnuah auction (lilam) hmanga tihral a ni ta tih a sawi.
Robert C Lalhmangaiha chuan, “A leitu hian Polytechnic building-a kuhva dah mek hi phur chhuaka a building a tihruah bakah thenfai ngai thian faiin, felfai takin a hna a kalpui dawn a ni,” a ti.