Aizawl: Education Minister Dr Vanlalthlana chuan tuna Mizoram sorkar sikul zirtirtu inzawmkhawmin sorkara lungawi lohna lantir meka badge dum an bel chu mak a tih thu a sawi.
Nimina ZPM party pisa-a chhung inkhawmah thu sawiin Dr Vanlalthlana chuan tunah hian Mizoram Government School Teacher’s Union (MIGOTSU)-ten bagde dum belin sorkarah lungawi lohna an lantir mek a, education department-in theihtawp chhuaha an tana hma an laknate ngaihtuah chuan an lungawi zo lo chu mak a tih thu sawiin, “Dan awm sain sikul upgrade tura a huam lohte pawh an tel theihna turin dan kan siam belh mek a, an tana hma kan lakna hi ngaichang thiam sela kan duh hle a ni,” a ti.
Higher & Technical Education Minister Dr Vanlalthlana chuan college-a zirtirtu indaih lohna siam tha turin MPSC kal tlangin lecturer 30 direct-a lak an tum mek thu a sawi a. Tunah hian zirtirtu sem rual nan transfer rules an buaipui mek thu leh an hrualmum theih tep tawh thu a sawi bawk.
Sorkar hmasate khan thil tha tam tak an lo ti chung khan a lera lan mawi ringawt kha an thupui nia a lan thu sawiin Dr Vanlalthlana chuan, RUSA hnuaia sikul an lo sakte pawh kum rei lo teah thawm that a ngai leh nghal der tawh tih a sawi.
Zirna siam tha tur hian theihtawp an chhuah zel dawn tih sawiin, “Union Home Minister Pu Amit Shah a lo zin tum khan central service-ah Mizote kan luh tam leh theihna turin coaching center tha kan lo dil a, a hlawhtling dawn niin kan hria a, a lawmawm tak zet a ni,” tiin, an hmabak kozia hi eptu party-te tluka hrechiang an awm loh thu leh an sulhnu an chhui mek tih a sawi a. Tun dinhmunah ram siam tha tur chuan ZPM party hi an tha ber a, theihtawp an chhuah mek a, a tum pawh hi an tum hle tih a sawi bawk.