- Dr. C. Lalrampana
A KAMKEUNA
Mizote hian thil engemaw hlek hmachhawnin tawng ila, a engamah hmaa rik hluai leh rik hut hut kan ching hle. Kan thil tawn leh hriatte chu engvanga lo awm nge, enge a chhan, enge a dinhmun leh nihna tak, engtia tih tur nge, eng anga hmachhawn tur nge tih lam erawh kan ngaihtuah tehchiam lem lova a phaw vuakah kan phili veleh chiam thin ni berin a lang. Ruihhlo hlauhawm chihrang hrang pawh hi kum 41 zet kan do ta. Ruihhlo, smuggling, ralthuam hlauhawm hlawm lian tham deuh man chang apiangin kan ri hut hut a, kan pawr hluai a, a ler lam atanga tihtawpa tihfel tumin Mob rule-in kan che chiam thin. A thatna lai tam tak awm mah se, a rehna lam erawh a ni lem lo. Chuvangin, ruihhlo hlauhawm hi kan dorem duh takzet a nih chuan awmze nei taka do dan, tihrem dan zawn chhuaha a taka bawhzui nghal zar zar chi a ni.
RAMRIAH KAN AWM
Mizoram hian international border 722 kilometer a nei a. Myanmar Khawchhak leh Chhim lamah kilometer 404 leh Chhim lam kilometer 318-ah Bangladesh a ni. Mizoram hian State ramri Assam, Manipur leh Tripura te a nei bawk. Mizoram hi Latitude: 21°58′ n atanga 24°35′ N a sei zawng: 92°15′ E atanga 93°25′ E India hmarchhak biala awm a ni. Hetianga international leh state ramri thui tak nei kan nih avang hian mihring khawsak phungah nawmna leh awlsamna tam tak awm mah se, dik lo taka sumdawnna kawng awlsam tak a nih avangin hming chhiat kan tawh phah nasa hle. Chungte chu hetiangin:
- Drug Smuggling: Mizoram hi Myanmar, a bik takin heroin leh methamphetamine ruihhlo hlauhawm tawlhruk chingte tan transit point pawimawh tak a ni a, drug smuggling kawngpui ber a ni mek.
- Cigarette Smuggling: Cigarette tam tak chu Myanmar leh Bangladesh atangin Mizoramah an luhpui a, chhiah chawi an pumpelh avangin he Sumdawnna hi a hluar hle.
- Gold Smuggling: Myanmar leh ram dang atangin Mizoramah rangkachak an la lut nasa hle thin a, a tam zawk hi zohnahthlak unaute kaltlangin an la lut thin niin a lang.
- Timber Smuggling: Myanmar leh a chhehvel atangin far, teak, thinguk etc. an lalut nasa hle.
- Wildlife smuggling: Ramsa smuggling-a kal theihna tur transit point tha tak a ni. Rannung, sakeibaknei, keite, leh sava ramdanga thawnchhuahna kawng remchang a nih avangin hetiang Smuggling dona kawnga hmalakna hi Mizoram sawrkar chuan central agency-te nen a kalpui mek a ni.
- Ralthuam tawlhruk: Mizoram hi indona ralthuam tawlhrukna kawng pawimawh tak a ni a, a bik takin Myanmar nena ramri a nih vang a ni. Mizoram-Myanmar ramri hi India rama ralthuam phurh luh nan an hmang nasa hle. Hei hian India hmarchhak biala hel leh firfiakte nen inzawmna thuk tak a nei a ni. Thuneitute chuan ramri bulah surveillance leh patrol an tipung a, ralthuam smuggling leh helna dona tur special task force an din bawk.
- Lunghlu lakluh: Mizoram kal tlanga lung hlu rubies, sapphires, leh jade ang chi lunghlu lakluhna kawng ber a ni. Thawmhnaw, *Document lem, thamna, leh official thenkhat rinawm tawklohnate avangin a hluar hle.
- Pawisa lem: Mizoram hi pawisa lem ‘fake note” hmanga sumdawnna kawng pawimawh a ni. India phai ram leh myanmar atanga pawisa lem lakluh tamna a ni a, a siamna khawl pawh bun tawk an awm a ni mahna!
- Kuhva ro: Assam rifles, customs leh police-te chuan Mizoram-ah myanmar kuhva ro (Burmese areca nuts) engemawzat an man tawh. Myanmar atanga kuhva ro tam tak lakluh hian Assam, Mizoram leh Tripura-a kuhva chingtu loneitute chu a nghawng chhe nasa hle a ni. Heng tarlan bak pawh hi sumdawnna tha lo, ram tana pawi thei thil chihrang hrang tam tak sawi tur a la awm thei a, sawi vek sen erawh a ni lo.
A TAKA HMACHHAWN A HUN
Ruihhlo hlauhawm chihrang hrang leh ralthuam hlauhawm chihrang hrang, Smuggling dona kawnga hmalakna hi a la nêp rih hle niin a hriat theih. Heng harsatna chihrang hrangte hmachhawn tur hian thuneitute chuan: Ramhnuai pilrila surveillance leh patrol tam zawk a dah a ngai ta. Smuggling dona tur special task forces chak tak din a hun takzet ta. Ramri Control leh Checks khauh zawk kalpui a tul ta hle. International agency-te nen thawhhona tha tak neiin smuggling networks-te zawn chhuaha thunun a hun hle. Ramri kanna tuipui kam lamah
Harbor Patrols tihpun a ngai ta. Ramri venhimna tihchak leh ralthuam phurh luh lohna tura patrol tihpun a hun. Inter-Agency Coordination, Central agency-te nen thawhhona tha tak neiin, Border Security Force (BSF) leh Customs Department-te nen, ruihhlo hlauhawm leh smuggling dona tur ruahmanna tha zawk siam kan mamawh. Mizoram sawrkarin State pual special task force emaw Mizo thalai thluak tha leh thiam bik leh rinawm bik awmkhawmna Mizoram Border Defence Force MBTF) battalion khat tal dinin ruihhlo lo luh theihna kawng zawng zawng hneh taka dan chah a nih theih nana hmalak vat vat a ngai. State hian sum a nei lo a nih pawhin NGO & Social agency hrang hrang atangin ruihhlo dona tur thawhhlawm khawn ni se, tuna sawt vak lo chunga kan sen teuh teuh thin hi awmze nei takin hman a ni thei ang a, a ler lam atanga ruihhlo do reh kan tum mekna ai hian awmzia a nei thei ngei ang. Mizoram hmun hrang hranga ruihhlo man leh do mek dan hi a sawt lo tihna ni lovin, kan do mekna leh hmalak mekna hi bansan chuang lovin nasa lehzuala awmze neia ruihhlo kan dorem theih nan duhthawh taka rawtna a ni e. A nihna takah chuan social media platform hrng hrang leh kawng hrang hrang: kawngzawh, vantlang inkhawm, banner tar, pamphlet, booklet, awareness campaign chihrang hrang, camping crusade, ruihhlo ngai enkawlna home chihrang hranga indahluh leh poster tarte nen kum 41 zet kan do tawh. Mahse, a nasa tual tual niin a lang. Kan ram dinhmun mek hi a rapthlak takzet ta e.
A TLÃNGKAWMNA
Heng hmalakna tur pawimawh tak takte hi a then kalpui mek ni mah se, a la nêp hle a, chuvangin, ruihhlo hlauhawm hmanga sumdawnna leh smuggling activities chihrang hrang tihtawp a, Mizoram venhimna tur hi tihtakzeta bengsika ngaihtuah a hun takzet ta. A bikin nitin heroin no 4 leh damdawi ruihhlo hlauhawm man a tam tual tual a, Mizo thalai nula tlangval zingah ruihhlo ngawl vei an tam tual tual bawk a nih hi! Khing zawng zawng khi Mizoram Kristian zaa 87.16% awmna ram, Pathian Biak in tha leh changkang tamna, zawlnei ngah, politician tawngkaa ram hmangaihtu tamna ram, eiruk leh sum thianghlim lo hmanga inchhekarbawm tamna, a ruka nawhchizuar tamna nia sawi, HIV+ vei tamna, cancer leh natna hlauhawm tihbaiawm pui pui tamna kan Zoram kaltlanga tawlhruk thinte vek a ni a; kan zavaia tanruala dorem dan ngaihtuah a hun takzet ta. Kan ram rorelna in sang ber Assembly House-ah leh sakhaw puithiam rualte hian zu ringawt an buaipui luai luai reng ringawt a nih chuan Mizoram kaltlanga ruihhlo hlauhawm leh smuggling chihrang hrang nitin zantina kal liam zut zut rengte hi kan do remin kan do hneh tawp lovang. Chuvangin, ruihhlo hlauhawm kan ram hmelma leh smuggling-te hi rik hut huta do rem chi a ni lova mob rule-a beih chi pawh a ni lo. Fing tak leh fimkhur tak, awmze neia beiha tihtakzeta do chi a ni. Hetih rual hian CYMA-in ruihhlo do dan ruahmanna chihrang a kalpui mekte hi chhunzawm zel bawk se tuna kan dinhmun mek ai hi chuan awmzia a awmin nasa takin hma kan sawn zawk ngei ang. Kohhran pawh hian bengsikin ngaihtuah chiang se, zu ringawt hi atchilhin haw hlur lo se, zu aiin ruihhlo hlauhawm hian kumtin Mizo thalaite nun a suat hnem fe zawk thin a ni tih E&ND statistic report atangte hian khaikhin ngam ve se a tha ngawt ang. Kohhranin zu ringawt a huat hlur avang hian kan politician rual lah hian campaign nana hmanraw tha berah ngaiin a ruka zu ngaina ru ve hle chung siin inthlana tlinleh loh hlauvin hmanraw tha berah ngaiin political platform hrang hrangah zu, zu, zu an ti ta sup sup mai a nih hi! Chuvangin, kan sawrkar pawh hian bengsikin ngaihtuah se ruihhlo do dan tha zawk leh awmze nei zawk dap chhuah dan ngaihtuahin chak zawkin hma la se alawmawm ngawt ang.