US chhim lam leh khawthlang laili hmun tam tak chu Easter chawlhkar tawpah khan ruah leh tui lianin a tibuai hle a. Oklahoma-ah naupang telin mi pahnih chu an lirthei nen tui liana an tan hnu an thi niin police-in an sawi.
Oklahoma-ah hian state pumah tui lian inralrinna tihchhuah a ni.
National Weather Service chuan Pathianni khan khawchhak lama Texas atangin chhimchhaka Iowa leh Illinois thlengin ruah a sur nasa hle tih a sawi a. Arkansas laili atanga Missouri laili thlengin tornado thawk thei leh thil tichhe thei thli a thawk thei reng tih an puang lawk bawk.
Oklahoma City chhim lam km 18 vela hla, Moore khuaa police-te chuan, “Kawngpuia veivahna leh tui tling nasa lutuk siam thei dinhmun a ni,” tiin Pathianni khan a sawi bawk.
“Kawngpuia lirthei pakhat chu lei hnuaiah tuiin a len lut a. Mi pahnih chu chhanchhuah theih an ni a, hmeichhe puitling leh mipa naupang kum 12 mi erawh hmuh mai an ni lo va, a hnuah an ruang hmun zui a ni,” tiin police chuan an puang.
Moore-a thuneitute chuan mipuite chu ina awm turin an ti a, Inrinni zan atang khan tuiin an lirthei dan avanga tangkhangte kohna tam tak an dawng tawh tih an sawi.
Tornado a thawk mai thei tia inralrinna pawh Arkansas, Kansas, Louisiana, Missouri leh Oklahoma-ah tihchhuah a ni tih National Weather Service chuan a sawi.
Tun thla tirah khan US-ah hian Texas atanga Ohio thlengin tornado leh ruahpui a sur chiam a, mi eng emaw zat thi an awm a ni.