Aizawl: Chief Minister Lalduhoma chuan Zofate hnam tobul chhuichhuah a, sorkar leh mipui pawm tlan neih a tul tih a sawi.
Padma Shree RL Thanmawia ziak lehkhabu, ‘Chhura Thawnthu (Hnam hrang hrangte sawi dan)’ tih chu nimin khan Assembly House Conference Hall-ah chief minister-in a tlangzarh a. Thu sawiin Chhura chanchin an hriat dan tlanglawn hi chu lak khawm harsa a nih a rinawm loh va. Nimahsela, Zo hnahthlak hnam hrang hrangten an hriat dan leh an inhlanchhawn dan rintlak tak lakkhawm erawh chu a hautak hlea a rin thu sawiin, “Hun pawh a duh rei ang. Harsa mah se a pawimawhzia hriain a bei hram hram a, a lo puitling ta a ni,” a ti.
Chief minister chuan Zofate hnam tobul chhuichhuaha sorkar pawmpui leh mipuite pawm tlan neih tul an tih thu sawiin, “A bultantu tur kan insiam chho mek a. Sorkar hian Zofate tobul leh kan inpumkhatna hi kan ngaipawimawh hle a ni,” a ti bawk.
Lehkhabu ziaktu, Prof RL Thanmawia pawhin thu sawiin, lehkhabu 37 a lo buaipui ve tawh zingah Chhura lehkhabu hi a hautak ber pawl nia a hriat thu a sawiin, “Hnam peng hrang hrangten anmahni tawnga ziaka han dah fel thlip thlepte an lo nei lo va, hnam peng 30 velin Chhura chanchin hi kan nei niin ka hria a, chung zinga hnam 16 velte thawnthu chauh chu tunah hian ka la lakhawm thei rih a ni. Pathian zarah kan la tihbelh zel thei turah ngai ang,” tiin lehkhabu a buatsaih dan a sawi.