Aizawl: Chief Minister Lalduhoma chuan tlawmngai pawlte chu engkimah inrawlh tum lo turin a chah.
Thawhlehnia Mizo Hmeichhe Insuihkhawm Pawl (MHIP)-in Vana pa Hall-a General Assembly vawi 24-na an neihah khuallian niin chief minister hian a hmanpui a. MHIP leh tlawmngai pawl dangte chu mahni pawl thil te, Pathian thil leh Kaisara thilte thliar thiam turin a chahin, “Kan hmalakna tur awm tak hi a awm a, mi dangte hmalakna tur awm tak pawh hi a awm mai. Engkimah inrawlh tum lo vang u,” tiin a chah.
Chief minister chuan MHIP chu ram leh khawtlang tana hnathawk thin pawl tangkai tak a nih avangin a ngaihlu tih sawiin, “Kan sorkarin hmeichhiate kan ngaihsakzia kan tihlanna langsar tak pakhat chu, a hmasa ber atana hmeichhe cabinet minister kan nei hi a ni. |ha takain lo thawhpui kan beisei,” a ti.
Mizoram hi India rama hmeichhiate dinhmun that berna zinga mi a nih a rin thu leh hmeichhiate hi state thawhchhuahah an inrawlh thuk hle tih a sawi a. Mizo hnam nunphungah hmeichhiate hi zah taka enkawl an ni thin a, a tilang chiangtu chu an tawng kauchheh hi a ni a. Tunah phei chuan kawng tam takah mipate pawhin hmeichhiate an tluk tawh lo a. Amaherawhchu, mipate rorelna hnam an ni a. Chhungkuaah hmeichhiaten an pasalte thu an ngaichang thin tur tih sawiin, “Chu chu nupui tha zia a ni. Zo nun ze mawi a ni satliah lo va, Pathianin nupuite awm dan tura a ruat a ni,” a ti bawk.
MHIP inkhawmpuiah hian an President Ngurmawii Sailo pawhin thu a sawi.