China chuan nikum September thlaa rawng taka Japanese mipa naupang kum 10 mi vit hlumtu chu an tihlum niin China-a Japanese embassy chuan a sawi.
Zhong Changchun-a hi China chhimchhaka Shenzhen-a Japanese sikula kal mipa naupang a beih avang hian January khan thi tura tih a ni.
He thil thleng hian ram pahnih inkar pawh a nghawng nain na tak takin an inbeih phah.
“Japan sorkar chuan pawi sawi lo naupang thahna hi ngaihdam theih loh sualah a ngai a, a titu tihhlum a ni ve hi phu kan ti hle a ni,” tiin Japanese embassy chuan thu a chhuah.
“He thil thleng avang hian Japanese sorkar chuan a theih ang anga himna tura hma la zelin Chinese sorkar pawh an rama Japanese-te himna pe turin a ti a ni,” a ti.
Pawi khawihtu tihhlum a nih thu hi Chinese Ministry of Foreign Affairs-in a hriattir a ni tih an tar lang bawk.
Naupang vih hlum hian China-a Japanese chengte pawh a tiralkhelin Japanese company-a thawk tam takte an buai a. Toyota chuan an staff-te chu inring tura tiin Panasonic phei chuan a thlawhna an hawna tur a ruahmansak.
Zhong-a’n naupang a beih hun hi politics-a hun pawimawh bik, September 18 niin kum 1930 chhova Japanese-ten Manchuria, China an luah tan champha chiah a ni.
China-ah hian ram dang mi beihna hi a thleng ta zeuh zeuh va, nikum khan American zirtirtu pali chu Jilin-ah vih an lo ni tawh.
June thla pawh khan Japanese nu leh a fa chu Suzhou-a bus dinna hmunah beih an ni a, anmahni lo chhantu Chinese nu a thih phah a. A beitu pawh hi nikum khan tihhlum a ni tawh niin Japanese thuneitute chuan kar hmasa khan an sawi.