Vairengte Kuhva Chingtu Co-operative Society, Bilkhawthlir Kuhva Chingtu Co-operative Society leh Hachhek Bial Kuhva Chingtu Pawl Joint Committee chuan dan loa ramdang kuhva man sa lilama a hralh a ni ta mai hi district thuneitute phena kuhva smuggler-te samphiar zawmna leh sorkar thuneitu sang zawkte ruahmannaah an ngaih thu an sawi.
Nimina thuchhuah an siamah VBH Joint Committee chuan dan lova ram dang kuhva man sa, Kolasib District Magistrate-in lilama a hralh chu pawi an tih thu an sawi a. Mizorama kuhva tawlhru thinte hian an kuhva man sate chu ukil ruaiin lilama tiral turin thuneitute an lo sawipui tawh thin a, hetianga an thil tum leh duhthusam anga rorelna kalpui a ni ta mai hi kuhva chingtute tan lungchhiatthlak an tih thu an sawi.
VBH Joint Committee chuan kuhva tawlhru thinte hian Mizoram sorkar kuta luhtira lilam hmanga lei chhuah leh mai hi an thil tum leh thiam taka an sawi fo thin a, kuhva man sate lilama tihral a nih chuan Mizorama kuhva chingtute market a chhe leh zual dawn tia thuneitute hnenah an tan a him dawn loh thu an sawiin, “Dan lova kuhva tawlh thinten Mizoram kuhva market a tihbuai em em laia hetianga kuhva man sa lilama tihral a nih chuan kan market a chhe leh zual dawn a ni,” tiin, Mizorama kuhva thar chhuah hralh hun hi thla rei lo te chhung chauh a ni a, hetianga kuhva sawngbawl sa leh dan loa ram dang atanga tawlhruk man tawh lilam a hralh theih a nih chuan kumtluanin kuhva tawlhrute tan kawng hawnsaknaah an ngaih thu an sawi bawk.
Mizoram sorkarin kuhva chingtute aw aia kuhva tawlhru thinte aw a ngai pawimawh zawk ta mai chu mak an tih thu leh tun hnuah lilam hmanga hralh tawh lo turin thuneitute ngenin, “Kuhva lilam hi tute nge lei, a leitu tur an thlan dan leh lilam chhangtute hming leh an leina rate-te puangzar turin Mizoram sorkar kan phut a. Restricted tender anga auction kalpui hi a him lo hle a, kuhva tawlhru thinte hian anmahni hming lang loin man sate hi an lei chhuak leh zel thei dawn tihna a ni,” an ti.
VBH Joint Committee chuan kuhva man sate tihral dan tur chungchanga Kolasib District Magistrate-in an buaina a sawite chu chhuanlam tlingah an ngaih loh thu sawiin, “Phum bona tur an duh a nih chuan kuhva chingtuten kan ngaihtuahsak thei. Kuhva man sa halral anih dawn chuan sum tam tak sen ral a ngaih dawn thu leh environmental issue nasa tak a awm thei dawn nia thuchhuah pawh hi sorkar sum sen ngai lo leh environmental issue buai loin kan hal ralsak thei reng a ni tih thuneitute kan hriattir e,” an ti bawk.
Mizorama kuhva chingtuten theihtawp chhuahin chhun zan zawmin, dan loa kuhva tawlh rukte danga hah taka an mante leh an report atanga police-in an man sate tihriral dan tur relhonaa kuhva chingtute sawm an ni ve lo hian, tihriral dan turah tum lawksa neiah sorkar an puh a. Sorkarah beiseina sang tak kan neih mek laiin, thil la thleng ngai lo, kuhva man sa lilama hralh a ni ta mai hi district thuneitute phena kuhva smuggler-te samphiar zawm sorkar thuneitu sang zawkte ruahmannaah an ngaih thu an sawi.