Aizawl: Kumin tawpa khawpui chhunga mountain bike intlansiak ‘Red Bull Aizawl Tlang Ruam Event’ buatsaih tum chu event dang nen kaikawpin, kum hmasa lam aia festival lian leh rei zawk buatsaih a duh thu Sports Minister Lalnghinglova Hmar in a sawi.
Red Bull Aizawl Tlang Ruam Event buatsaih tur chungchangah nimin khan Sports Minister pisa-ah sawiho niin, hetah hian Minister Lalnghinglova Hmar chuan Aizawla ‘Urban downhill racing’ buatsaih leh tura hmalak a ni chu lawmawm a tih thu a sawi a. Nikumah Aizawl Tlang Ruam event hlawhtling tak buatsaih a lo ni tawh a, a hautakin Red Bull tan pawh senso a tam a rin thu a sawi a. Chutih rualin khawvel mithmuhah Mizoram leh Mizote a phochhuaktu a ni chu lawmawm a tih thu a sawi.
Tourism Minister ni bawk, Lalnghinglova Hmar chuan mountain bike-a intlansiak piah lamah event dang nen kaihkawpin, kum hmasa lam aia festival lian leh rei zawk buatsaih a duh thu a sawi a. Mizoram mawina leh nawmna phochhuak lehzual tura her rem hret theih nia a hriat thu a sawi.
He hunah hian Red Bull atangin Giridhar Narsaria, Field Marketing Manager pawhin thu a sawi.
Red Bull Tlang Ruam event hi lian zawka kalpui tum niin, a kawng pawh thui zawk leh harsa zawka siam tum a ni a. Intihsiaknaa tel mai bakah mentor pawh nikum aia tam zawk neih tum niin, live streaming titur pawh biak fel tawh a. A hun atan ruahtui hul hun November thla ruat chhin phawt a ni.