Aizawl: Mizoram State Sports Council (MSSC) kum 50-na Golden Jubilee lawmna, kum khat chhung awh tur hawnna inkhawm chu nimin khan Vaivakawn Cultural Centre & Auditorium-ah neih a ni. MSSC President hmasa ber, Dr. H. Thansanga, ex-minister chuan khuallian niin Golden Jubilee lawmna a hawng.
Jubilee lawmna hawngtu khuallian Dr. H. Thansanga chuan kum 1976-a MSSC a din tan tirha hma an lak dan leh din tura harsatna tam tak an paltlang dan te sawiin, kum 50 hmel a hmu ta chu ropui a tih thu leh lawmawm a tih thu a sawi a. Hetih hun chhung zawnga MSSC hruaitute inpekna ropui a tih thu a sawi bawk.
MSSC chu ram buai laia Mizo thalaite nun sahawk leh kal ngaihna hre lote an awm awl mai mai loh a, awmze nei a an nunphung her rem a nih beiseia din a nih thu sawiin, hun lo kal zelah huang zauh a ni zel ta chu hmasawnna ropui tak a ni, a ti.
He hunah hian Sports Minister Lalnghinglova Hmar pawhin thu a sawi bawk.
MSSC Golden Jubilee pual hian nimin zing khan Golden Jubilee Torch (meichher) Relay neih a ni a, Bawngkawn atanga tanin Sports Association 34 aiawh ten Aizawl khawpui chhungah meichher inpe chhawngin, Sports Minister Lalnghinglova Hmar, MFA President ni bawk chuan Aizawl Tennis Court-ah a tlan luh pui a, inkhawm tawi neih zui a ni.