Aizawl: MPCC President Lal Thanzara chuan Mizoram chhungkaw tam tak buaina thlentu ruihhlo tawlhtute leh a zuartute nena ram hruaitu inhnaivai taka an khawsa mek hmuh hian Mizoram mipui thinlung a na tih a sawi.
Thawhlehnia Hachhek tlangdung tlawha a zinnaa Congress party mite nena an inkawmnaah MPCC President Lal Thanzara chuan Mizoramah ruihhlo a hluar em em tih sawiin, “Kan minister-te pawh Assam Rifles hovin an zim luih luih a. Mizoram chhungkaw tam tak buaina thlentu ruihhlo tawlhtute leh a zuartute nena ram hruaitu chu inhnaivai takin an khawsa mek hmuh hian Mizoram mipui thinlung a ti na a, kohhran nun a nghawng mek a ni,” a ti.
Kuthnathawktute tana inzuar ZPM sorkar chu kuhva chingtute harsatna thlentu kuhva tawlh ruk chu sum siam nan chhuanlam siamin an zuar tih sawiin Lal Thanzara chuan, “Sorkar hi smuggler lian tia koh theih turin contraband, smuggling goods a man khawm sa a hralh duh hian a lantir a. Kuthnathawktute leh NGO te rilru thuk takin a hliam a ni. Hetiang a nih avang hian Mizoram hian he sorkar hnuaiah hian chunglam malsawmna beisei ngam chi a ni lo,” a ti bawk.
Lal Thanzara chuan, politics kal sual avangin khawvel hmun tam takah ram a buai tih sawiin, “Kan chhehvelah Bangladesh, Manipur, Myanmar lama kan unaute pawhin nasa takin an tuar. Mizoramah pawh politics kal sual vangin kum 20 chhung ram a buai a. Mi tam takin nunna an chan a, piansual phahte, tun thlenga rilru la thlaphangte an la awm. Tunah politics kal sual avangin kuthnathawktuten nasa takin an tuar a. Rim taka an thawhrah te chuan kuthnathawktute lungawi lohna a cho chhuak mek,” tiin, Mizoram hian thil duhawm lo tak kuthnathawktute lungawi lohna hi a tawn mai a hlauhawm tih a sawi.
MPCC President hian Mizoram leh Assam ram inrina, Thinghlun rama 4th IR battalion camp a tlawh nghal bawk.