ZORO chuan Free Movement Regime (FMR) thiah leh border fencing siam hian mi sual, ruihhlo tawlh thinte a dan an rin loh thu an sawi.
Thawhlehni khan ZORO chuan an Vice President Rohmingthanga Kawlni kaihhruaiin an pisaah executive an thukhawm a. FMR hlipa border fencing siam hian mi sual, ruihhlo tawlh thinte a dan a rinawm loh a, a dan dan tha ber, fencing a nih hma pawha ruihhlo kaltlangna ber check gate-a duty (Assam Rifles, Mizoram Police leh Customs)-te tichak tur leh ruihhlo kaihhnawiha sumdawngte beihpui thlak tak meuha zawn chhuah hna nasa leh zual zawk a thawk turin sorkar laipui leh Mizoram sorkar an ngen.
Ruihhlo leh dan lova sumdawnna avanga an dikna chanvo chhuhsak leh an hnam hma hun thui tak chhe tur te, ram tam tak an chan tur leh an eizawnna thlenga nasa taka a ngawng turte ngaihtuahin a tuar turte chu mi dik, fel bak an nih a rinawm loh avangin an unaute nena zalen taka an inkalpawh theihna dan (FMR) hi a nihna anga dah let leh a, an inkara border fencing pawh an hnam kal zel tur atana him lo leh an dikna chanvo rah behna leh chhuhsakna a nih avangin kaltlangpui lo turin India sorkar an ngen nawn leh tih an sawi.
Meeting chuan India sorkar laipuiin FMR leh ramri hung a tum chu an a tawp thlenga a dodal chhunzawm tur thu a sawi nawn lehin, mipui pawhin thlawp tlat turin an ngen bawk.