Aizawl: Land Revenue & Settlement minister B Lalchhanzova’n Mizoram Academy of Letters (MAL) in kum 2024 chhunga lehkhabu tha bera an thlan, ‘Book of the Year 2024’ lawmman chu ‘Hun Inher Kara Zofate’ tih lehkhabu ziaktu F Vanlalrochana hnenah a hlan.
I&PR Auditorium-a Book of the Year hlanna inkhawmah B Lalchhanzova chuan, ziakmite chu hnam rohlu an nih thu leh ram leh hnam tana thuziak tha tak tak hnutchhiah turin leh, lehkhabua ziak mai piah lamah ngaihthlak theih tur zawnga an thuziakte pawh pho chhuak turin ziakmite chu a chah.
MAL book of the year, 2024 lawmman dawngtu F. Vanlalrochana chu a lawmpui thu leh chhuanawm a tih thu sawiin B Lalchhanzova chuan, “Mizo hnam chanchin kal tawh atanga chhuiin, Mizote thatna leh ropuina lam a thlir a, chumi hmang chuan hun lo kal zel tur a kawhhmuh bawk. Hetianga a eng lam zawng leh a tha lam zawnga ziak lehkhabu hi kan hnam hian a mamawh a, hetiang lam lehkhabu hi kan ziah tam deuh deuh a tul a ni,” a ti.
He huna tar lan anih danin, kum 2024 chhungin Mizo tawnga lehkhabu ziak 215 lakkhawm a ni. Heng lehkhabu atang hian a tha zual 20 an thlan hnuah 10 thlang lehin, chuta tang chuan pathum an thlang chhuak leh a, pathum an thlan chhuah atangin Book of the year chu thlan a ni. Heng lehkhabu thlanah hian Committee chu a rawttu chauh an ni a, thutlukna leh thutawp siamtu chu MAL Executive Council an ni.