India-in a awp chin Kashmir-a ram mawi tak tlawhtu ram chhung mi khualzinte chu Thawhlehni khan mi sualten an pawng kah a, mi 24 vel an thi niin thuneituten an sawi.
Mi beihna hi Himalaya tlangdunga Pahalgam-ah niin heng lai hi a ram hmelhmang a mawi em avangin ‘Switzerland of India’ tia an sawi thin a ni.
Chief Minister Omar Abdullah chuan beihna an tawh chu ‘tun hnaia civil mite beihna an tawhah chuan a la na ber’ tih a sawi a. Hliam pawh tam tak an awm a, thenkhat chu an na hle tih a sawi bawk.
US President Donald Trump, Russian President Vladimir Putin leh EU chief Ursula Von der Leyen te pawhin beihna hi an dem thu an sawi hlawm.
“Kashmir chanchin thar chuan min tina hle a. United States chu firfiaka chetna do kawngah India nen an tangho zel ang,” tiin Trump-a chuan Truth Social-ah a tar lang.
Von der Leyen-i pawhin Kashmir-a thihna chu ‘mi firfiakte beihna rawng tak’ a ti a, Putin-a pawhin ‘pawi a ti’ tih sawiin ‘pawikhawihna rawng tak’ tiin a sawi bawk.
Saudi Arabia tlawha zin mek, India Prime Minister Narendra Modi chuan a hun hman tur titawiin a thlawk haw nghal a, a titute chu an chungah ‘dikna hlenchhuah’ a ni dawn tih a sawi.
“Firfiak laka hma kan lakna an tithuanawp dawn lo va, na zawkin kan che zel ang,” tiin Modi-a hian X-ah a tar lang.
Kum 35 vel ram buai ni tawh mah se Thawhlehni anga khualzin beihna hi a thleng tam lo hle a, a awm zeuh zeuh chauh.
Home Minister Amit Shah-a chuan Kashmir-a khawpui lian ber, Srinagar a thleng nghal a, zanah emergency security meeting a ko nghal.
Lieutenant Governor Manoj Sinha chuan a hmunah hian sipai leh police tam zawk tirh luh nghal an nih thu a sawi.
Eng pawl mahin an tihah an la chhal lo va. Muslim tamna state hi kum 1989 atang khan helnain a tibuai tawh a; mahse, tun hnaiah tharum thawhna a tlem tawh hle.
Tuna thil thleng hi Pahalgam atanga km nga vela hla, tlang chhip mawi tak, Baisaran-a thleng a ni.
A hmun hi lirthei pawhin a thleng thei lo niin Jammu & Kashmir Inspector General Police Vidi Kumar Birdi chuan a sawi.
Kah zinga tel, Gujarat atanga tlawhtu chuan beih thut an ni a, an zavaiin an tlanchhia a, an tap a, an au tengtung niin a sawi.
Indian chanchinbua video tihchhuahah chuan Indian sipaiten beihna thlenna hmun hi an pan a, video dangah chuan a kaptute hian Muslim ni lo an bitum nia sawina pawh a lang.
Social media-a video darhah chuan ruangte chu tlang zawl rai tha laiah a let nual a, thenkhat tap leh puihna dil pawh hmuh tur a awm.
Police chuan silaia kah hliam khualzinte hi damdawi inah dah an ni tih an sawi a. A hmun hi tlawh theih lohva tih nghal niin sipaiten checkpoint-ah lirthei an tiding zel a. Indian sipai leh Jammu & Kashmir police-in a huhovin mi zawn hna an thawk mek.
Indian chanchinbute chuan Nilaini khan hmun hrang hrangah thil thleng duh lohna lantir nghal a ni tih an tar lang hlawm.
Kum 1990 chho vel atang khan Kashmir-ah hian India thuhnuaia awm duh lo hel pawl chetna avangin mi sang tel thi an awm tawh a, venhim hna thawktute bakah civil mi tam tak an tel.
Himalaya tlangdunga state pakhat hi kum 1947-a Britain laka India a indana Pakistan nena an inthen atang khan a buai tawh.
Nuclear ralthuam nei ram inthenawm pahnih hian an ram niin an chhal ve ve a, vawi hnih an indo phah tawh a, indo lova buaina chhuak neuh neuh pawh a awm reng.
India chuan a sipai 5,00,000 zet a dah.
Kum 2019-a Modi-a sorkarin mahnia inhung bikna dan a neih chu a thiahsak a, hemi hnuah hian venhimna pawh tha hret hretin tharum thawhna pawh a thleng tlem sawt hle.
Civil mite beihna lian thleng hnuhnung ber chu June, 2024 kha niin Hindu biakzin phurtu bus beih a ni a, mi pakua thiin mi 33-in hliam an tuar.
Kum 2019 khan thihchilh bomb hmangin Kashmir-ah hian sipai beih niin sipai 46 an thi a, hemi chhang let hian India chuan Pakistan ram chhung a kah phah.
Pahalgam hi khualzinte tlawh tam hmun a ni a, tual chhung mite bakah ram dang pawhin an tlawh nasa hle a, tun hnaiah sorkarin khualzin tam zawk hip tumin hma pawh a la nasa.
Kum 2024 chhungin Kashmir hi khualzin maktaduai 3.5 velin an tlawh niin thuneitute chuan an sawi.