Aizawl: Lai Autonomous District Council (LADC)-ah ZPM kaihhruai sorkar a nghing. BJP kaihhruai sorkar, Joint Legislature Party chuan nimin khan Mizoram larsap hnenah sorkar siam a nih theih thu an thlen.
Nilaini zing khan LADC-a sorkarna siam tur chungchangah BJP Mizoram State President Vanlalhmuaka kaihhruaiin Aijal Club-ah an thukhawm a. MNF party aiawhin Robert Romawia Royte, MLA, BJP aiawhin Dr K Beichhua, MLA leh Delson Notlia MDC, BJP National Minority Secretary te telin LADC MDC member 13 leh nominated member pakhat nen, an vaiin member 14 an tel.
BJP thuchhuah chuan, LADC-ah hian ZPM chhuahsana BJP-a lut MDC pahnih leh MNF MDC 11-ten sorkarna an siam dawn a. Congress MDC pakhatin pawn lam atangin a thlawp dawn avangin LADC-ah hian BJP kaihhruai Joint Legislature Party siam a ni dawn tih an tar lang.
Aijal Club-a Joint Legislature Party thukhawm chuan N. Zangura, ZPM chhuahsana BJP zawmtu, M. Kawnpui bialtu MDC chu Legislature Party Leader-ah thlan a ni a, nimin vek khan larsap hnenah sorkar siam theih a nih thu thehluh nghal a ni bawk.
LADC-a ZPM MDC V. Zirsanga kaihhruai sorkarna kalpui mek hi floor test paltlang lo an nih avangin larsap chuan sorkarna siam tur chuan dan ang ngeia floor test paltlang a ngaih thu a hriattir a. V. Zirsanga kaihhruai ZPM hian budget session nei mekin larsap chuan floor test pal tlang lova executive hmalakna reng reng chu dan kalh a nih thu hrilhin a rang thei ang bera floor test nei turin hriattirna lehkha a pe.
Chutihlaiin, nimina MDC Member 14 te hian tuna LADC-a sorkarah hian rinna an nghat thei lo va, Joint Legislature dina BJP kaihhruai sorkar din mai thaa an hriat avangin, member 14 te chuan April 22, 2025 zan khan Aizawl rawn pan nghalin, nimin zing khan BJP leh MNF te chuan Joint Legislature dinin, N Zangura chu Leader atan lungrual takin an thlang ta a ni.
Tuna ZPM sorkara CEM V. Zirsanga hi February 27, 2025 khan CEM atan lakluh a ni a, a hnu March 17 khan Executive Member pakua lakluh an ni leh a, sorkar dinglai chuan Emergency Session pawh April 17-22, 2025 chhung khan paltlangin, Budget pawh pass a nih hnuah, eptu lam tangrual, MNF, MDC 11, ZPM, MDC pahnih leh Congress MDC pakhat, an vaiin MDC 14 te chuan ZPM atangin BJP zawmta N.Zangura kaihhruaina hnuaiah LADC ah sorkar din tumin hmalakna hi an kalpui a ni.