Aizawl: MNF Vice President Lalchhandama Ralte chuan ZPM sorkar chu mi tam tak beidawngtu leh sorkar hnathawkte beng tithleptu an ni mek tih a sawi a. Mizoram mipuiin mawhphurhna la ngam lo sorkar an hrawn mek niin a sawi.
Nilaini khan Serchhip Kawnpui VC Hall-ah ‘Serchhip District chhunga MNF VC tling tharte chawimawina hun’ hmanpuitu Lalchhandama Ralte, Leader of Opposition ni bawk chuan, ZPM sorkar hneh taka an tlin hnu lawka, VC inthlan zawh takah MNF-in hnehna pangngai taka an chang hian ram neitu an nihzia a tichiang tih a sawi.
Leader of Opposition chuan ZPM Party chu eptu an nih lai khan sorkar kalta zawng zawng tlin lohna leh hmelhemna kher chhuakin, social media-ah an rak chuah chuah a. |ha bik nia insawiin, kohhran leh pawl dang behchhanin Pathian ram din tur anga intiam an ni tih a sawiin, “Sorkar tawhte ang lo takin ‘Kan ti ve lo ang tih’ tiam an ngah hle. Mahse, an sorkar hnuah enge thleng? Kan ti lo ang an tih apiang an ti a, an tih tur tiam an ti lo thung a. Sorkar kal tawh an selte ai mahin an fawm tawp a, party induhsak bikna kawngah nise a che-na na an ni ta a. Mi tam tak beidawng leh sorkar hnathawkte beng tithleptu an ni mek thung,” a ti.
ZPM chu Nationalism kengtu nia insawi kha an ni tih sawiin, “An sorkar hnuah nationalism nekpuar thil a thleng fo va; chutih hunah chuan hnam tana an din ngam lohzia a lang ta zeuh zeuh a. Thil fuh lo a awmin sorkar kal tawh an mawhpuh a, a tha lamah anmahni thawh angin an sawi leh thung a. Mawhphurhna la ngam lo sorkar kan hrawn mek a ni,” tiin, Mizoram tana beitu pawl hrang hrang, NGO ten ZPM sorkarah hian mak tih an ngah, an beidawng, an ring tawk lo mek niin a sawi.
He hunah hian Serchhip District chhunga MNF VC tling tharte 61 te hnenah VC tlingtharte chawimawina thuziak hlan an ni.