Pope Francis-a chu Inrinni hian St Peter’s Square-ah vui a ni dawn tih Vatican chuan a puang tawh a, a tel tur mi sang tel zingah ram hruaitu lawk tak tak pawh an tel.
Catholic Church hotu ber hi tar lan tawh angin Thawhtanni khan kum 88 mi niin a thi a, a hma darkar 24 pawh tling lovah Easter thuchah a la sawi thei a. Tun hnaia pneumonia avanga enkawl a nih hnuah a chak lo hle a ni.
Ram hruaitu leh lal zinga a vuinaa tel turin Sir Keir Starmer, Donald Trump, Prince of Wales leh Brazilian President Luiz Inácio Lula da Silva te chu an chiang tawh.
Vatican City-ah hian a suntu mi sang tel an kalkhawm mek a, pangpar, kraws leh bati kengin an tawngtai bawk.
Thawhlehni khan Vatican chuan Pope hun tawp darkar 24 hman dan tur an puang chiang tawh bawk.
Damdawi ina chawlhkar nga a awm hnua Isua Thawhleh Nia bathlara a inlan khan sawi a hlawh hle a. “Ka theiin i ring em?” tiin a mi mal nurse, Massimiliano Strappetti chu a zawt nghe nghe.
Strappetti hian a theih beiseiin pontiff hi St Peter’s Square-a mi tam tak pungkhawm hmaah bathlarah a inlan zui a ni.
A tuk zing dar 05:30 atangin a nuam lo zual tan a. Darkar khat hnu velah Strappetti-a chu a kutin a hui a, biak theih lohvin a awm zui ta a ni.
“A bul hnaia awmte chuan engmah na leh hrehawm tih hmelin a awm lo tih an sawi,” tiin Vatican chuan thu a chhuah.
Nilaini tuk khan Pope Francis-a ruang hi vuina hun hmanpui tura buatsaih turin cardinal rualten Chapel of Santa Marta atangin St Peter’s Basilica-ah an dah a, hetah hian a kuang hawngin Zirtawpni thleng amah suntuten an thlah theih nan a awm ang.
Vui tan hmain Pope awm loh hlana kohhran enkawltu, camerlengo, Cardinal Kevin Farrell-a kaihhruain tawngtaina hun hman a ni dawn a ni.
Vatican chuan Thawhlehni khan kum 12 chhung a lo chenna, Casa Santa Marta chapel-a a ruang thlalak hi a tichhuak a. Thuilohkawr sena thuam niin a chalah papal mitre dah a ni a, a kutin rosary a keng bawk.
Nilainiah khan vantlang tan St Peter’s Basilica chu chawhma dar 11:00 atanga zan lai thleng hawn a ni a. Ninganiah erawh zing dar 07:00 atanga zanlai leh Zirtawpniah zing dar 07:00 atanga zan dar 07:00 thleng hawn a ni ang.
Ama duh dan ang leh an tih loh dan angin vardinal tan a mi mala en hun siam a ni dawn lo va, a kuang pawh dah san bik a ni lo bawk.
Inrinnia vuina inkhawm hi chawhma dar 10:00 (India-a chhun dar 01:30)-ah St Peter’s Basilica-ah neih tur a ni.
Khawvel hmun hrang hranga patriarch, cardinal, archbishop, bishop leh priest an tel dawn a. College of Cardinals dean, Cardinal Giovanni Battista Re chuan inkhawm a kaihruai ang.
Cardinal Battista Re hian a vuina leh thlahna thuchah a sawi ang a, Pope chu Pathian hnenah a kaltiur ang a, a ruang chu St Mary Major-ah phum tura lak a ni ang.
Heta tang hian ni kaw chhung sunna, Novemdiales an tih chu an tan dawn a ni.
Inrinniah hian mi 2,50,000 zel vuinaa pungkhawm tura ngaih a ni a.
Ram hruaitu leh lal tam tak an tel dawn a. Prince William, US President Trump, Spain King Felipe VI leh Queen Letizia leh French President Emmanuel Macron te chu an chiang tawh.
Ukrainian President Volodymyr Zelensky, Argentina President Javier Milei leh Italian Prime Minister Giorgia Meloni te pawh an tel dawn.
Pope-te hi a tlangpuiin St Peter’s Basilica chhunga marble thlana kuang pathum (triple coffin)-ah phum thin an ni a. Pope Francis erawh ama duh angin Rome-a Basilica of St Mary Major-ah phum a ni dawn.
Kum 100 chuang hnua pope zinga Vatican pawn lama phum leh hmasak ber a ni ang.