Aizawl: Central YMA hnuaia ruihhlo do pawl, Central Anti Drugs Squad (CADS) chuan hun eng emaw chen an veh tawh, ruihhlo No. 4 (heroin) hawng 400 (kg 4 leh gram 821) chu nimin zing dar 3 vel khan lirthei pahnih leh a khalhtu nia mi pahnihte Saitualah an man. Rs 1,12,00,000 hu vel nia ngaih a ni.
Central YMA tar lan danin heroin an mante hi Grand i10 car (MZ01/J-8898), Thangsangpuia, 28, Zawra Veng, Farkawn khua, Ramhlun North-a cheng mek nia insawi khalh atangin hawng 200 (kg 2 leh gram 400) man a ni a. i10 car (MZ01/H-6514), Malsawmdawnga, 29, Zawra Veng, Farkawn khua, Khawmawi, Myanmar-a khawsa mek nia insawi khalh atangin hawng 200 (kg 2 leh gram 421) man a ni bawk.
Lirthei khalhtu mi pahnih mante hian an lirthei khalhte chu Lalhmingmawia, Ngur, Champhai district nia an hriat, Zokhawthar leh Khawmawi, Myanmar lamahte a khawsa kual vel thin niin an sawi a. Ruihhlo an phurh pawh hi ama ta vek nia an sawi bakah Lalhmingmawia nen hian Vairengte daia hnam dang hnenah Rs 80,000 ve ve hlawha hlan tura inbe fel an nih thu an sawi bawk.
Lirthei khalhtute inpuan zelnaah tun tum hi an vawi thum kalna chiah niin a vawi khatnaah hawng 100 ve ve phurin a vawi hnihnaah hawng 200 ve ve an phur leh a, tunah pawh hian hawng 200 ve ve an phur leh niin an sawi.
CADS hruaitute chuan Lalhmingmawia hian ruihhlo nasa takin a tawlh tih hriain an chhui reng a, a lirthei regn. no. an hriat hnuah an man ta a ni.
Hawng 400 leh lirthei pahnih leh a khalhtute an man rual hian a neitu tak nia sawi, Lalhmingmawia erawh Myanmar lamah a tlanchhiat hman avangin man a la ni ve rih lo.
CADS hian lirtheite hi Zokhawthar atanga a chhuah atanga a thlen chin hre zelin Nilaini zan tir atang khan Saitualah a tawp a. Central YMA president hovin CEC leh CADS member-ten Aizawl atanga kalin Keifang leh Saitual chhehvel dapa an beidawn thelh hnuah Sub Headquarter YMA, Saitual hruaitute puihnain an lo riahna, Manase Home Stay, |amdil Road, PWD veng, Saitualah an nang a, thuneitute thu rawn angin Aizawl thlenpui an nih hnuah Excise & Narcotics Deptt. thuneituten an ruihhlo thuhrukna atanga hai chhuakin thubuai an siamsak zui ta a ni.
Ruihhlo man hian Aizawl thlenpui a nih ve leh Home Minister K Sapdanga leh Excise & Narcotics dept Minister, Lalnghinglova Hmar ten Central YMA Office panin an lo dawngsawng a ni.