Aizawl: Lengpui Airport venhim hna chu nimin khan Mizoram DGP Anil Shukla chuan Central Industrial Security Force (CISF) kutah a hlan.
Lengpui Airport venhim hna inhlan chhawnna pual hian inkhawm tawi buatsaih niin, khuallian DGP Shukla chuan CISF ten hna tha tak an thawh theih a duhsak thu a sawi a. Mizoram chu ram dang pahnih nen a ramri intawm a nih avangin dan phal loh thil tawlhruk a tam thu te sawiin, hemi kawngah hian Airport lama duty-te pawh an fimkhur thin a tul thu a sawi.
He huna hian Vijay Prakash, IG CISF/APS-I HQr, New Delhi leh Deepak Verma, DIG AP (E&NE) HQr, Kolkata te’n thu an sawi bawk.
Kum 1999 atang khan Lengpui Airport venhim hna hi Mizoram State Police leh Central Reserve Police Force (CRPF) ten an lo kalpui a. Airport chu a hmangtu passenger an lo tam belh zel avangin leh sorkar laipuiin ram puma civil aviation facility-te venhimna tihchangtlun zawk a duhna nen inrem taka CISF hi airport-a dah an ni.
Tunah hian Lengpui Airport-ah CISF personnel 121 an duty dawn a ni.