Aizawl: Chief Minister Lalduhoma chuan Aizawl Maumualah a thawh khatna atana returnee ram pek chinho bik re-survey zawh a nih hunah ram awl a lo awm a nih pawhin mi mal dang hnenah pek a duh ve loh thu a sawi.
Aizawl Maumuala LSC ram nei intel khawm, Maumual Land Owners’ Association chuan nimin khan chief minister an hmu a, LSC neiten harsatna an tawh hrang hrangte leh Maumual-in a mamawh a panna kawng leh PHE tui connection dilna te an thlen a, CM hian an harsatnate a lo hriatthiampui thu leh a rang thei ang bera chin felpui tura hmalak a nih tur thu a sawi.
Maumual ram hi kum 1987 chhoah MNF returnee-te tana sorkarin a pek a ni a, kutthlak theih rih lova re-survey a ni a, approve mai hmabak nia an hriat thu te, a rang lama in sak phalna pe vat tur leh re-survey pawh approve tawh turin leh in sak vat theih vat an duh thu Maumual Land Owners’ Assn. chuan chief minister hnenah an thlen a ni.
Chief minister chuan Aizawl Maumualah in sak phal a nih veleh ram neite chu kawng hnaih lutuka in sa lo tur leh Aizawla veng nuam tak din thei tura chahin vantlang ram turte pawh khawtlang tana tangkaia hman a nih nan lo humhalh tlat turin a sawm a. Maumual-ah hian a tira returnee ram pek chinho (phase I) bik re-survey zawh a nih hunah ram awl a lo awm a nih pawhin mi mal dang hnenah pek a duh ve loh thu a sawi.
Maumuala returneee tana pek ramte hi returenee ni lo mi tam takin an lei chhawng tawh a, returnee ram la neite pawh an la awm nual a ni.
Maumual Land Owners’ Association hian CM relief fund atan member-ten an thawhkhawm Rs. 23,400 an chhung lut nghal.