All Mizoram Contractors Association (AMCA) chuan dan lova thil kal tam lutukah court-ah an zualko dawn tih an sawi.

Ningani khan AMCA hruaitute chuan Aizawl Press Club-ah thuthar thehdarhtute kawmin sorkar laka an thil phut hrang hrangte an sawi a. An thil phutte a hlawhtlin theihna atan hma an la dawn tih sawiin, “Kan thil phut hi a hlawhtlin ngei theih nan theihtawp kan chhuah dawn. A tul ang zelin hma kan la ang,” an ti.

AMCA hruaitute chuan contractor-te dinhmun a chhiat avangin an thil phut hrang hrangte chu sorkarin dan a siam ve turah hain dah ngei se an duh tih sawiin, dan lova thil kal tam lutukah court-ah an zualko dawn niin an sawi.

AMCA hruaitute chuan contractor-te tan hnathawh tur a van avangin kaisan mai pawh a har a. Chuvangin, contractor-a kum 15-a an senior tawh chuan kaisantir an duh thu leh contractor-te tan loan awlsam zawk leh hniam zawka puk theihna dan siam tur te, tender chhan a nihin dan ang taka chhan thlap tihte, contractor atana dah ngheh tawh te chu an lo upat a hna an thawh theih loh hunah zangnadawmna pek te, contract hna awmah department work a hna tam lutuk hi tih tawp te, tender lova duhsak zawng zawng hna inpek hi dan kalh a nih angin tender ngei sorkar an phut tih an sawi.

AMCA-te thil phut thenkhat:

• Tun hnaia tender chhanna man to ta lutuk hi sorkarin bithliah rawh se.
• Sorkarin contractor-te tan hna chhuak apiangah zaa 30 tal dah zel rawh se.
• Sorkarin contractor atana a pawm tawh chu renew ngai tawh loin kalpui tawh rawh se.
• Contractor-te tan tender an chhanin earnest money ngai loa, chhan ni rawh se.
• Contractor an boral in sorkarin ral ve tawh rawh se.
• Contractor te tan Mizoram sorkarin thlenna a neih Tourist Lodge ah te, Inspection Bungalow ah te, Mizoram House ah te Mizoram sorkar Department hnuaia thlenin awm ah te, a man zat ve chauhin thlen tir ve rawh se.
• PWD hnuaia Contractor te department danga contract hna tender an chhang thei lo hi chhang ve thei rawh se.
• Department hrang hrang hnuai a Contractor te pawhin P.W.D. hnuaiah pawh Tender chhang ve thei rawh se.
• Sub-Contractor te tan 100 a 25 work done neih theih hi 100 a 35 ah tih san ni rawh se.
• Contractor te hming hawh a, a hawhtuten Sub-Contract a hna an thawh work done an lak dawnin a tira phalna lak kher ngai loin an thawh zawh hun hunah work done hi lak phalsak ni rawh se.
• Contractor te an lo boralin an aiawh tur an nupui fanaute an awm chuan an aiawh phal ni rawh se.
• Tender a awmin a form man sumdawnna ang maia sang tak taka lei ngai hi tih tawp vat ni rawh se.