Aizawl: MNYF Hqrs chuan dan lova kuhva ro mansa dahkhawmna atanga truck phur hnih lai sorkar venhimna hnuaia phur chhuah leh a ni chu mak an tih thu leh an dem tak zet thu an sawi.
An thuchhuahah MNF thalai chuan a vawi hnihnan nimin khan Thingdawl Polytechnic building-a dan lova kuhva ro man sa dahkhawmna leh truck phur hnih lai man sa awm chu senghawi tumin an tlawh tih an sawi a. Kuhva ro man sa sorkarin a enkawl dan leh a hralh chhawn danah thil dik lo a tam hle tih an hmuh belh zel niin an sawi.
MNYF chuan Rs nuai 400 chuang man nisi, Rs 14,63,000 chauha hnam dang smuggler-te hnena hralh a ni hian Rs nuai za bi eiru an awm tih a tihchian thu an sawi a. “Sorkarin ruk ruk thil a lilam hrim hrim hi a mak em em a, reserved price (chhan hniam theihna ber) pawh siam lova sorkar duhsak zawngte lei tir an nih dan phei hi chu mak kan tiin kan dem tak zet a ni,” an ti.
MNYF chuan drugs leh Burma kuhva roa sumdawnna an do zel tih sawiin, Mizo mipuite pawhin tawiawma pui turin an sawm tih an sawi bawk.