Aizawl: MZP General Headquarters chuan an president, H Lalthianghlima hovin nimin khan Buhchangphai an tlawh a. Assam Forest-ten khaw chhunga Chhimluang, Ramthar zau panna lei siam mek chawlhsan tura an tih chu a hmunah an endik.
MZP hruaitute sawi danin, Buhchangphai khawchhung Chhimlung lui, Ramthar Zau panna lei hi a that tawk loh avangin Mizoram sorkar chuan Minor Irrigation hnuaiah RCC leilawn an siam mek a. Chhimluang lui lehlamah hian Buhchangphai khaw miten huan lo ram neiin, ei leh bak zawn nan an hmang hlawm a. Heng huan lo ramte hi Mizoram Land Revenue & Settlement Department hnuaiah LSC neiin, chhiah pawh Mizoram sorkar hnuaiah an pe a. Buhchangphai V.C ram pass nei engemaw zat an awm bawk.
Niminpiah khan heng huan neitute mamawh lei Mizoram sorkar hnuaia dawh that mek chu Assam Police leh Assam Forest-ten an tlawh a. Assam ram chhung nia sawiin, hna thawh mek hi tawpsan nghal turin an hriattir bakah, Assam Hailakandi DC chuan stay order a chhuah nghal bawk.
He thil thleng hi MZP chuan an hriat veleh a hmunah tlawh nghalin, Buhchangphai VC nen an sawiho a. Helai hmuna lei dawh mek hi a rang thei ang bera dawh zawh a nih theih nan hma an lak zel tur thu leh sorkar hmalakna pawh a thlithlai zui zel dawn tih sawiin, “Mizoram chhung ngeia Assam lamin thuneih an rawn tum fo hi hriatthiam har kan ti a. Ram humhalh turin theihtawp a dodal zel dawn a ni,” an ti.
MZP chuan Mizoram sorkarin ramri dep khuate hmasawnna hna an thawk hi lawmawm an tih rualin, hetianga state dangin ramri an nekna hi na taka chhang let zel turin sorkar a ngen a. Ramri dep khuaa hmasawnna hnathawh leh hmalakna hrang hrangah khawthlang hruaitute hriattirin thawhpui thin se an duh thu an sawi bawk.