Aizawl: MPCC Treasurer Dr Lalmalsawma Nghaka chuan MNF sorkar kalta leh tuna ZPM sorkar mekah hian danglamna a awm lo tih mipuiin an hmu fiah viau tawh niin a sawi.
Dampa East Block huam chhunga khaw thenkhat tlawha an party mite nena nimina an inkawmnaah MPCC Treasurer Dr Lalmalsawma Nghaka chuan, “MNF hun chhung zawng khan bumin kan awm a, an hotupain mumang ramah min hruai a, SEDP min tiam a engmah min pe leh si lo. Chuvangin, MNF-te hi chu mipui tan rin an har tawh a ni,” a ti.
ZPM chungchang pawh sawiin, ZPM sorkar pawh hian hun rei lo te chhungin mipui beisei an pha lo tih a lang nghal a. Thlai thar lei chungchangah an intiam angin an kal lo va, kawng hrang hrangah mipui beisei an phak lohzia an hmu chho zel tih a sawi.
Dr Lalmalsawma Nghaka chuan, tun dinhmunah hi chuan MNF sorkar kalta leh, ZPM sorkar an hrawn mekah hian danglamna a awm lo tih mipuiin an hmu fiah chho viau tawh a. Heng anih avang hian Congress party hian Mizoram mipuite rawngbawl sak leh turin nasa takin hma an lak mek thu a sawi.
MPCC treasurer chuan, “Kan hna hmasa ber tur chu Mizoram sum leh pai dinhmun siamthat leh a, mi harsa zawk leh kuthnathawktute, kan hmeichhiate leh thalai rual dinhmun chawi kan hi a ni. Chumi atan chuan kan policy tur pawh kan hrual mum chho mek a ni,” a ti bawk.