Aizawl International Half Marathon 2025 (AIHM 2025) chu Inrinni zing khan hlawhtling taka buatsaih a ni a. He intihsiaknaah hian mi 1,500 chuang an tel.
Mizoram sorkar Sports & Youth Services Department, Athletic Federation of India leh Innovations India Pvt. Ltd. te tangkawp buatsaih, AIHM-ah hian intihsiakna chi li — Half Marathon (21.1 Km), Open Race (10 Km), Fun Race (5 km) leh Junior Category (5 km) ah then a ni.
AIHM intihsiakna hi Inrinni zing dar 6:30 khan Sports & Youth Services Minister Lalnghinglova Hmar chuan Rajiv Gandhi Stadium atangin a vai liam a. Aizawl khawpui chhuahlam World Bank Road-ah tlanin a bultanna Rajiv Gandhi Stadium-ah tawpna siam a ni.
Half marathon category-ah pakhatna chu mipaah Heman Singh a ni a, hmeichhiaah Tamsi Singh niin, lawmmanah Rs 1,25,000 leh medal bakah certifcate an dawng a. Open race category-ah pakhatna chu mipaa Sushil niin, hmeichhiaah Thelma Lianhmingthangi a ni a. Lawmmanah Rs 50,000, medal leh certificate an dawng ve ve a. Fun Race huangah mipaah Daniel Lyngdoh Wahlang leh hmeichhiaah Malsawmdawngkimi te chu pakhatna niin, lawmmanah Rs 20,000, medal leh certificate an dawn a. Junior huangah pakhatna chu Krishna Kant Sahu niin, Rs 10,000, medal leh certificate hlan a ni bawk.
Intihsiakna neih zawh hnua Rajiv Gandhi Stadium-a a kharnaah larsap General Vijay Kumar Singh, AIHM 2025 Patron ni bawk chuan hmanpuiin, a vawikhatnan hlawhtling taka Mizoramah Aizawl International Half Marathon buatsaih a ni chu lawmawm a tih thu sawiin, tun aia changtlung leh lian tham zawk, mipuite ngaihhlut leh tam zawk tel theihna buatsaih tum a nih thu a sawi.
Larsap chuan a hlawhtlin theih nana theihtawp chhuahtu Sports Minister, Athletic Federation of India, Innovation India Pvt. Ltd. leh anmahni tawiawmtute fakawm a tih thu sawiin, taksa hriselna leh insawizawi ngai pawimawha marathon tlan zawng zawngte chu tun atanga lo inpuahchak lawka tlan chhunzawm zel turin a chah a. AIHM chu India rama intihsiakna event mipuite ngaihven hlawh ber a nih thuai a beisei thu a sawi bawk.
Sports Minister Lalnghinglova Hmar chuan thawhhona tha tak hnuaia hlawhtling taka AIHM hmawrbawk a ni chu lawmawm a tih thu a sawi a. Mizoram mai bakah state pawn atanga telte fakawm a tih thu a sawi a. Nakkumah pawh buatsaih leh tum a nih thu sawiin, a hun atan Valentine’s Day, February 14, 2026 ruat a nih thu leh tun aia tam zawk an tel ngei a beisei thu a sawi.
Kharna inkhawmah PWD Minister Vanlalhlana, Forest Minister Lalthansanga, Deputy Speaker Lalfamkima, Adviser to CM Lalmuanpuia Punte, South Tuipui bialtu MLA Jeje Lalpekhlua, Innovations India Pvt. Ltd. CEO Capt Rahul Bali te pawh an tel a ni.