Aizawl: Kolasib district chhungah tun dinhmunah Mizorama sahimna zawnga state pawn atanga raltlan chhungkua 70 awm mek.
Zirtawpni khan Kolasib Bawrhsap Robert C Lalhmangaiha hovin DC Conference Hall-ah an district-a raltlante dinhmun ngaihtuahin an thukhawm a. He huna Saipum, Thingdawl, Bilkhawthlir leh Khamrang khawtlang hruaitu ten an khua theuha raltlante dinhmun an tar lan danin, tun dinhmunah Thingdawl Polytechnic building-ah Manipur atanga raltlan chhungkaw 11 awm mekin, Saipum khuaah 36, Bilkhawthlir-ah paruk awmin Khamrangah Myanmar atanga raltlan chhungkaw 17 an awm mek.
Raltlante zingah hian mahni khuaa haw leh mai duh thenkhat an awm rualin, a bikin Manipur atanga raltlan thenkhat chu hawna tur pawh nei tawh lo leh Mizorama awm hlen duh pawh an awm nual tih anmahni enkawltu khawtlang hruaitute chuan an sawi a. Heng mite hian a tlangpuiin anmahnia eizawnna indapin mi hnena inhlawhin eizawnna an dap thin tih an sawi bawk.
Thutkhawmah hian Manipur atanga raltlante chu central sorkarin displaced people (raltlan)-ah a pawm loh avangin anmahni chhawmdawlna tur hi central atangin ruahmanna a awm lo tih sawi a ni a. Mizoram sorkar ngenna avangin hun engemawti chhung atan central sorkar chuan an tan buhfai a pe a, hei hi tunah chuan a tawp tawh tih sawi a ni bawk.