Aizawl: Mizoram Lok Sabha MP Richard Vanlalhmangaiha’n Mizorama raltlan chungchangte Chin Refugee Community aiawhte a sawipui.
Inrinnia New Delhi-a Richard Vanlalhmangaiha chenna ina an inkawmnaah hian Chin Refugee Community-a hnam hrang hrang aiawh mi 12 an tel a ni.
An inkawmnaah Richard Vanlalhmangaiha chuan Mizoram chhunga Myanmar atanga Zohnahthlak unau raltlante atanga sorkar phal loh ruihtheihthil tawlh rukna leh sualna dang dang lo thleng thin chu pawi a tih thu a sawi a. Hetiang thil a thlen tawh loh nana venpui turin leh thawhpui turin Chin Refugee Community aiawhte a ngen.
Chin Refugee Community hruaitute pawhin thil duhawm lo tak lo thleng thin chu pawi an tih thu leh, Mizorama raltlante chu lo zirchianga dan bawhchhe zawnga raltlante pawh an awm tawh lohna tura theihtawp chhuah an tum thu MP hi an hrilh a ni.
Chin Refugee Community te hian India ram chhunga an harsatna tawh dan hrang hrang te MP hi an sawipui bawk a; MP hian an harsatna te lo zirchiang a, a tul dan anga hma lo lakpui a tum thu a hrilh a ni.
Tunah hian Delhi khawpui chhung ringawtah hian Chin raltlan hi mi 7,000 chuang an awm niin an sawi bawk.