Rwanda leh Democratic Republic of Congo ramte chuan an ram ve ve an inzahsak tawn theihna turin inremna an ziak a, muanna atana inremna pawh Zirtawpnia ziak turin an inbe rem bawk.
Inremna hi Zirtawpni khan an foreign minister ve vein Washington-ah an ziak a, US Secretary of State Marco Rubio-a’n a telpui.
Tun hnai thla eng emaw zat liam taah khan Rwanda-in a puih M23 helte chuan DR Congo khawchhak lama ram leilung hausa lai chu beiin ram zau tak an la hman a, mi sang telin an in leh lo an tlanchhiatsan phah.
Ram zau tak an hloh hnuah Kinshasa-a sorkar chuan an leilung hausakna nena inthleng turin US hnenah puihna an dil a ni.
Washington-a an inbiak dawn thleng hian DR Congo leh Rwanda inkar hi a chhe hle a, inbiakna hmanga an harsatna ching fel tura hmalakna a awm erawh ram pahnih tak thil tha tak nia ngaih a ni.
Inremna an ziahah hian US sorkar leh mi malin ram pahnihah hian investment lian zawk an tihthar a beiseiawm.
Hetih lai hian Zirtawpnia inbiakna kalpui a nih mek lai pawhin North Kivu province-ah chuan inbeihna a la awm reng.
Kar liam ta tir lamah khan DR Congo leh M23 hian muanna an duh thu an sawi ve ve a, inkahhai an puan thuai an beisei tih an sawi ve ve.
DR Congo khawchhak lama thuneitute chuan January atang khan mi 7,000 vel thah an ni tawh tih an sawi.
Kum tam tak ram pahnih inkara neuh neuh awm tawh hi kumin kum tira M23-in rin loh taka thapui thawha chea Congo khawchhak lama khawpui lian ber pahnih, Goma leh Bukavu an lak hnuah thawm a ring zual a. Hel pawl hi Rwanda-in a puih bawk avangin heng lai velah ram leh ram indona lian zawk a chhuah phah hlauhna pawh a lian hman hle a ni.
DR Congo hian Rwanda hi ralthuama M23 pui leh an ram chhunga helnaah hian sipaite pawh tir lut niin a puh a. UN leh US pawhin hei hi a rin dan ni mah se Rwanda chuan helho hi a puih loh thu a sawi ve thung.