- Dr. C. Lalrampana
A KAMKÊUNA
System hi thil tihdan, inrel dan ruangam tiin a sawifiah theih mai awm e. System dik chuan a thil tum tihhlawhtlinna atan a ruhrel leh pianhmang, dik leh tha, tangkai tak a keng tel a ni. System ziarang pawimawh tak tak thenkhat chu dikna (fairness); rorelna dik (justice); hlawhtlinna (effectiveness); langtlang (transparency) leh mawrhphurhtheihna (accountability) a keng tel ngei ngei bawk. System dik chuan dikna chu a vawng tlat a, mimal, pawl emaw, sawrkar chu an thiltih avanga thubuai siamsak an nih theih nan a phuar a ni. A tum ber tihhlawhtlinna atana ruahmanna tha a ni a, chu chu service pek emaw, dikna humhalh emaw, mi zawng zawng tana thil tha tih emaw pawh a ni thei. System dik chu thutlukna siam kawngah a langtlang thin a, mimal emaw pawl emaw, sawrkar emaw chuan thutlukna dik siam dan an hriatthiam phah thin a, a tangkai hle thin. System dik chuan mimal, pawl, sawrkar emaw chu an thiltih avanga mawhphurtuah a dah a, thutlukna leh an thiltih danah mawhphurhna an neihtir bawk thin.
SYSTEM DIK HMAN A NI EM?
Kum 2023-a
ZPM Campaign auhla kha poliitical Party dangte la tih ngai loh deuh vek a ni awm e. “Kalphung thara kal a ni anga, chumi hnuaiah chuan, midangte aiin kan tha bik dawn min enchhin rawh u; thil tha kan ti dawn” hemi vanga kan tlak phah a nih pawhin pawi kan ti lo” tih chu an Central idea ber kha a ni a. Hei bakah hian Asian Development Bank atangin sum kan puk ve ang em? tih zawhna an chhanna chu-”a teuh lo mai* tih a ni. “Sum puktu ni lovin puktirtu kan ni dawn” tih leh a dang tam tak a la awm. Tunah ADB atangin Mizoram Universal Health Care Scheme (MUHCS) sum tur puk a ngai ta si le? An insawi angin an awm em kan bih thlak reng a ngai ang. DEC. 8, 2024-a an sawrkar tirhin, CM approval awm lo chuan Restricted Tender chhuah phal loh tih Finance department notification chhuah a ni a. Tichuan, Ramrikawn to National Highway 54 via Sakawrtuichhhun kawng siam mek a Restricted tender lem a chhuah tum hmasak CM-in a lo hnawl (reject) a. (Ama sawi dan). Restricted tender lema chhuah a nih thu department atangin complaint tute hrilh an ni a. Complainant-te hian Contractor hming tumtu leh a thawktu tur an kawm nia sawi a ni. CM hnenah kalin cancel leh turin an ngen. Mahse, a theih tawh loh thuin a lo chhang.
Pu Vana’n LPS-a interview turin a sawm. Interview hmain tap chungin cancel leh turin CM an ngen. Interview tan dawn tepin CM-in a rawn phone a, a cancel thu a rawn sawi. Interview pawh CM fak nan hman a ni ta zawk hlauh. Assembly house-ah CM-in tap chunga an ngen vanga cancel leh a nih thu a sawi. Open tender-a tih tur ti si, Departmental work a tih phalna an lo peleh lawi bawk. E-in-C PWD office-ah complainant-te hian thil awmzia an zawt fiah a, restricted Tender dik tak emaw, open tender dik taka tih rawtna a tlang zo lo tih thu an dawng. Social media kaltlangin thil awmzia an sawi chhuak, PHQ quarter 26 sak chungchangte nen.
Monitoring Secretary atangin Pu Ruata Sailo ban a ni thul.
Sakawrtuichhun khawtlangin hnatlangin kawng an siam bawk. He kawng hi kum 2024 December thla atang khan Pavement Quality Concrete (PQC) a chhun tur chu Plain Cement Concrete (PCC)-in chhun tan a ni ta hlauh ni awm tak a ni a, tunah hian 60% chhun zawh tawh a ni. He hna hi kumin May thla a zawh tura ruahman a ni a, Kilometer 3 leh a chanve a thui PCC a chhun tura ruahman a ni. Mahse, an thawh chinah a khi chat nasa hle. A system a dik.loh vangin hna a tha thei lo tih a chiang hle. Chuvangin, system dik an hmang ngamleh tak tak si lo hian kawng chhia a hring chhuak mek a nih hmel hle.
A TLÂNGKAWMNA
Mipui sawrkar, kalphung thar sawrkar hian Ministry dangte hun (term) tawp dawn hnaiha mipui sawisel leh phun khum an hlawh thin aia nasa zawk mahin kum 1 ½ chhung lek hian Zoram mipui sawisel an hlawh ta chiam mai hi engdang vang ni lovin Election campaign laia an tawng hnem lutuk leh an tih theih loh tur an auchhuahpui hnem lutuk vang liau liau niin a lang. Sawhthing pawh a rate leh market hresa vek angin research base-in engkim kalpui mai turin an auchhuahpui ni khan a lang a. Mahse, kuthnathawktute tan lungngaihna chirhdup an siamsak ta mek zawk niin a lang. Tunah an la lei lohna lam tlangdung an hrutleh dawn mek a, an lei tawhna tlangdunga an lei zawh loh hmabak, sawhthing chawhsa neite tan beisei bo a nileh mek thung. Sawhthing chingtute kalkawng dal buai zawngin chawh lawk an khap, mahni thua hralh theih mang bawk si loh, sumdawng nazawng lei an phal bawk si lo. RS MP Pu Vena tih ang deuh khan Sawrkar hi lo inrawlh lo law law se kuthnathawkte hian zalen takin sum chang thlaite hi hralh zung zung thei se, kuthnathawktute hian harsatna an hmachhawn tlem zawk ngei ang. Chuvangin, Central scheme/project leh state Project hrang hrangahte hian system dik hi a takin kalpui ngam mai se, mipui phunchiarna tam tak hi a kiang ngei ang.