Aizawl: AH&Vety department, Mizoram State Veterinary Council leh Indian Veterinary Association (Mizoram) tangkawpin Inrinni khan ‘Animal Health Takes a Team’ tih thupui hmangin Veterinary Polyclinic Hospital, Khatlaah World Veterinary Day 2025 pualin hun an buatsaih a. He ni pual hian a mamawhte tan ui leh zawhte vaccine pek nghal a ni.
IVA President Dr. Robert Rualthankhuma kaihruai inkhawmah Additional Director (VS&PH) Dr. F. Lalramhluna chuan World Veterinary Day 2025 thupui a sawi a. World Veterinary Day 2025 thupui atan ‘Animal Health Takes a Team’ tih chuan ran hriselna enkawl kawngah veterinary doctor mai bakah veterinary technician-te, public health lama thawktute, ran chaw tha leh hrisel awm tura thawktu agriculturist-te leh ran vulhtute tanrual leh thawhho a pawimawh zia a sawi a. Ran leh mihring chu inzawmna thuk tak nei an nih angin ran hriselna chuan mihring hriselna pawh thui tak a nghawng thin thu sawiin, khawtlang hrisel siam tur chuan ran hriselna ngaih pawimawh hmasak tel a tul thu a sawi.
Hemi hnu hian Free Anti-Rabies Vaccine pekna hun hman chhunzawm a ni a. He hun ah hian ran 150 Chuang vaccine pek a ni.
Tun dinhmunah Mizoram State Veterinary Councilah member 405 an awm mek a, kum tinin World Veterinary Day hi April thla Inrinni hnuhnung berah neih thin a ni a. Veterinary Doctor ten ran hriselna venhimna leh enkawlna kawnga infuihtharna hun atan leh a thlawn a ran hriselna endikna hun atan hman thin a ni.