Aizawl: MPCC Sr. Vice President Lalnunmawia Chuaungo chuan ZPM sorkar chu research base ni lovin, a tlachawpin arkhawthim daiin an kal tih a sawi.
Inrinni chawhnu khan Zodintluanga, ex-MLA, in, Durtlang Leitana Aizawl North I bial, Durtlang khuaa Congress party worker-te’n intuaitharna hun hmanpuitu Lalnunmawia Chuaungo chuan, Mizoramin sorkar a neih tawhah Congress party a rintlak ber tih a sawi.
Lalnunmawia Chuaungo chuan tuna ZPM kaihhruai ZPM sorkar te hi intiam theihna zawng zawngah an intiam emaw tih mai tur khawp an ni tih sawiin, “Mipui hnenah nasa taka an intiam avanga an mahni ring em em lo te pawhin an intiam nasat avangin, ‘enchhin ve ila’ tia thlang an ni a. Mahse, kum khat awrh an sorkarah hian mipui leh eptu party-te thlengin kan beisei an pha lo va. Research base ni lovin, a tlachawpin, arkhawthim daiin an kal a ni ber,” a ti.
MPCC Sr Vice President chuan mipui nawlpui kutah sum a luh a, mahni ke a ding thei an tam hunah ramin hma a sawn leh zual ang a. Chu mi tur chuan chhungkaw nuai 1.4 aia tam mah hnenah NLUP cheng nuai khat sem thei, mahni thutiama ding thin Congress party chuan an sorkar chuan NLUP changtlung zawk an sem leh dawn a, a tihdan tur an ruahman mek tih a sawi.
He hunah hian Zodintluanga, ex-minister pawhin thu a sawi a. MPCC Sr Vice President chuan an party-ah mi thar a lawm lut nghal bawk.