Aizawl: ZPM Southern Hqrs., Extended Elected Office Bearers meeting chuan a rang thei ang bera Aizawl-Thenzawl-Lunglei (ATL) road siam that hna thawk tan turin sorkar an phut.
Inrinni ZPM Southern Hqrs., Extended Elected Office Bearers meeting chuan, ATL road chungchangah chhim lam mipui rilru natna hi awm an tihpui thu leh an thlawp thu an sawi a. ATL road siamthat hna a rang thei ang bera lang theia tan nghal turin sorkar an phut.
Thutkhawmah hian tun hnaiah budget pawn lam atanga hun hmasa lama ATL road kaihhnawiha sum hmuhlet leh te pawh chief minister-in he kawng siamna atana hman a lo remtihsak tawh ang ngeiin, chhim mipuite beiseina ang hian ATL road siamna tur hian ruahman sak leh nghal turin an ngen.
Chhimlam mipuite duh dan ang hi tihlawhtling ngei turin sokar an ngenin, an phut tlat tih sawiin, “Tun dinhmunah chuan ZPM Southern Headquaters Office, Lunglei hawn pawh hrehawm kan ti hle. Chuvangin mipui rilru damna tur thutlukna min siamsak kan duh tak zet a ni,” tiin, ZPM Southern Hqrs. Lunglei chuan April 28, 2025 atang hian office work engmah khawihloh nise an ti bawk.
ZPM Southern Headquaters Extended EOB meeting thurel hi sorkar hian ngaih pawimawh sak a, a hlawhtlinna tur kawng ruahmansak nghal ngei turin an ngen bawk.