Aizawl: Forest Minister Lalthansanga chuan ZPM sorkar chu dan behchhana an kal zel dawn avangin mipui rilru sukthlek pawh a dik zawngin a her rem zel an beisei tih a sawi.
Thawhtanni khan ZPM Gen. Hqrs chuan an pisa-ah chhung inkhawm an nei a. He huna thusawitu Forest Minister Lalthansanga chuan mi thenkhatin sorkar thil tih thatte hmu thei lo vin, rem leh rem lova sorkar demna tur hlir an zawng thin chu pawi a tih thu sawiin, “Mipui tana sorkar hmalakna chhuanawm tak takte hliah khuh an tum thin hi politics ramhlui zia a ni, kan kal pelh a hun tawh hle a ni,” a ti.
ZPM sorkar hnuaiah dan hmangin an kal zel tih sawiin Lalthansanga chuan, “Sorkar hmasa hun lai atanga dan kan lo ngai pawimawh tawk loh avangin a chang chuan hriatthiam loh a hlawk lek lek thin a. Nimahsela, dan behchhanin kan kal zel dawn a, chu chuan mipui rilru sukthlek pawh a dik zawngin a her rem zel kan beisei a ni,” a ti bawk.
Aizawl East-I bialtu MLA chuan ZPM sorkar hian ram chhunga cheng hnam tenau zawkte a ngai pawimawh a, hnam ziarang hrang hrangte leh chin dante, chawisan leh humhlah zel an tum tih a sawi a. Zoram chhunga hnam hrang hrangte tan ZPM party chu innghahna tlak leh inpui ber a ni mek tih a sawi.
Lalthansanga chuan ATL Road chungchangah pawh sorkarin ruahmanna tha tak a siam a, Lunglei mipuite pawhin sorkar ruahmanna hi ringngamin ngaichang thiam se a duh tih a sawi bawk.