Aizawl: MNF President Zoramthanga chuan Mizo hnam dam chhuahna awmchhun chu nationalism a ni tih a sawi.
Thawhtannia Mizo Hnam Run chhung inkhawm hun hnihna, political session-a thusawitu MNF President Zoramthanga chuan Israel-te pawh nationalism banga inhung tur an nih laiin an inhung phui zo lova, hnam sawm an ral. Kum 2000 an vahvaih hnuah Juda leh Benjamin hnam tlem (Isarel)-te an dingchhuak a. Kum 1948 khan an nationalism-in a dinchhuahtir chauh tih a sawi.
MNF president chuan, “Pathianin keini hnam tlem te pawh ram min pe a. Khawchhak atanga lo tla thlain ram, hnam leh lal thuthlung nen kan nationalism chu kum 1966-ah a lo tho ta a. Kum 20 chhung hnam thinlung thisena baptis-in a awm a. A tawpah kum 1986-ah inremna kan lo nei ta,” a ti.
Hnam thinlung (nationalism) hi a rei tulh tulh a, hnam tlem zawk tan chuan a hlu tulh tulh tih sawiin Zoramthanga chuan, “Dam chhuahna awm chhun a ni. Kan chhehvel en ila nationalism tel lo chuan hnam engzat nge buai tawh? Kan hnam martar-te thisen hlutna hi a rei tulh tulh anga kan hre tulh tulh dawn a ni,” a ti bawk.
Chief Minister hlui chuan a lehkhabu ziah (autobiography) chu khawvel lehkhabu publisher hmingthang tak Penguin Publisher chuan an publish sak tur thu a sawi a. He lehkhabu hi MNF din tirh atanga inremna lo thlen thlenga MNF history kim chang taka ziak a ni. Ram buai hma leh hnu history a nih bakah, inremna tura inbiakna history kim chang takte a nih thu leh zirlaiten an chhawr tangkai ngei a rin thu a sawi.