Pope Francis-a chu Inrinnia Rome-a Santa Maria Maggiore biak ina phum a nih hnuah Pathianni khan a thlan thlalak tihchhuah zui a ni a, mi tam takin thlan hi an tlawh nghal.
Thlalakah hian a thlan chungah rose par var pakhat chauh dahin pontiff a nih laia a hming chauh a inziak a. A chungah krawsa khenbeh lai lem awmin êng pakhat chauhva chhun a ni.
Pope hi Italian khawpuia basilica lian pali zinga pakhatah phum a ni a, he biak in hi cardinal leh pontiff a nih chhunga vawi eng emaw zat a tlawh a ni a. Inrinnia Vatican-a vui a nih hnuah khan mi tlem tê nen a thlanah hian vuina hun hman leh a ni bawk.
Pathianni tuka biak in hawn a nih atangin a thlan hi mi tam takin an tlawh nghal a ni.
Francis-a kha Virgin Mary ngaisangtu niin Santa Maria Maggiore hi kum zabi palinaa sak a nih khan a puala biak in din hmasak ber a ni.
Basilica hi Colosseum bul maia awm niin an khawpuia hmun lun lai ber, Termini station atanga hnai te, pope tam zawk an phumna, Vatican pawn lam chiaha awm a ni.
South American pontiff hian he biak in hi a ngaihlu hle a. Puithiam pakhat chuan a hmain Italian chanchinbu hnenah Pope Francis hian kum 2022 daih tawhah khan he hmuna phum hi a duh tih a sawi tawh niin a hrilh nghe nghe.
Francis-a vuinaah khan sorkar leh ram hruaitu bakah lal tam tak an tel a, Catholics sang telin Vatican khawlai an luah khap bawk.
Vantlang huapa vuina inkhawm hman zawhah Pope Francis-a kuang hi Rome khawpuiah muangchanga kawng zawhpui a phumna hi panpui a ni.
Thuneitute chuan kawngah hian mi 1,40,000 vel an pungkhawm niin an sawi a. Tiber lui kânpuiin Rome-a hmun langsar – Colosseum, Forum leh Piazza Venezia Altare della Patria national monument te an kalpel.
Pope vui liam a nih hnuah ni kaw chhung sunna hun hman zui mek a ni a. A thlaktu tur thlanna thutkhawm chu May 5/6 vela tan tura rin a ni a, cardinal 135 an tel dawn a, tun lai chanchina pope thlannaa tel an tam ber tum a ni ang.