Mizorama nungcha humhalh kum puanga Central YMA in hma a lakna pawh kum 20 chuang a ni ta. Mahse, nungcha humhalhah hian kan pawl lian ber, mizoten kan ngaihsan em em YMA meuh thupuan pawh hian kan thinlungah hian awmzia a va nei mawh em.
Nungcha humhalh hi kan sawi nasa a. Mahse kan thinlungah a riak si lo ni ber hian a lang. YMA kumpuan thawm a rin lai kha chuan ramsa leh nungcha tihhlum nana an lo hman thin silai tung fel ta kha report hmuh tur a awm reng a. Mi tam takin ramsa kap tawh lo tura thutiamte an nei a. Kan titiah pawh khang thu tiamtute kha kan ngaisang a. Kan in bul hnaia sava lo fu ringawt pawh hmuhnawm kan tiin kan lawm a nih kha. Mahse, pi leh pute atanga kan lo chin than tawh nungchate ei atana tihhlum chu kan sim hlei thei tlat lo mai. Ramsa leh sava tihhlum hi dan kalh a ni tih pawh kan thinlung hian a ngaihsak leh ta lo a ang khawp mai. Chuvangin ramsa leh nungcha humhalh hi a bul atanga awareness tan that leh a ngai ni hialin a lang.
Kan ram mipui hian tu thusawi leh zirtirna nge kan ngaihsan ber ti ila. Chhanna chiang sa chu kohhran a ni. Kohhran thu anih tawh chuan a kawi a ngila zawm mai tum hi kan tam em em a. Vawiin ni thlenga ruahmanna fel zawk neia zu zawrh kan pawm theih lohna chhan pawh kohhranin tha a tih loh vang a ni ber a. Chuvangin kohhran hian nungcha humhalh hi thupuiah han neih se chuan ramsa leh savate chu kar lovah an pung leh nghal ngei ang. Kohhran upate thlenga sakhi sa ei chak ngawih ngawih maite hi kan la ni a. Ramsa aia tui sa chi hrang hrang leh eitur kan ngahziate hi kan kohhrante hian han tlangau pui ngat se chuan kar lovah ramsa leh sava chu an lo pung nghal ang tih hi a chiang a. Humhalh duh leh thahnemngai ten theih tawp chhuah reng mahsela an thusawi kan pawm ber kohhran in hemi lam hawi a thu a kamkeu deuh loh chuan hma kan sawn thei lo a ni. Kan synod moderator te hi wildlife warden te han ni thei se nungcha humhalh lamah kan boruak a danglam ngei a beiseiawm khawp mai.
Kawng hrang hrangah kohhran hian ram tan leh kan thlarau tan rawng an bawl a. Nungcha humhalh lama kohhran lamin hma a lak hi a remchan lohna a awm chuang lova. Thil tha ti tura inpeih reng kan kohhran hi ramsa leh savate humhalh tura tan la turin i phut chhin teh ang u.