Aizawl: MPCC chuan nimin khan Congress Bhavan Golden Hall-ah Devotion leh Political session an hmang a. He huna thusawitu MPCC General Secy K Lalchhuanawma chuan sawi anga awm lo, ram hruaitute hi ramin a mamawh lo tih a sawi.
K Lalchhuanawma chuan ZPM sorkara chief minister Lalduhoma’n ni thum chhunga thlai thar leina dahtu hian, a interview-naah a bain an lei loh tur thu leh an pek zar zar tur thu a sawi a. Sawhthing market zirchiang lo vin, researched based lovin an lei ta a. Sawhthing chingtute an mangang mek a, ZPM sorkar hian an hmalakna hrim hrim hi researched based in an kalpui lo nia a lan thu a sawi.
MPCC Gen. Secy. hian ZPM an sorkar hmaa CM-in portfolio a nei lo ang tih te, CM-in Adviser a nei lo ang tih te, kohhran duhloh engmah an ti lo ang tih te chu an sorkar hnuah an intiam angin an awm leh si lo tih sawiin, “Sawi anga awm lo, ram hruaitute hi kan ramin a mamawh lo,” tiin, enchhin sorkar hi ram mipuiin a tha lo tiin an hnualsuat mek thu leh, ZPM vote tu tam tak mipui hian inthlan leh thuai thuaia paihthlak an nghakhlel hle tih a sawi.
Kum 2028 MLA inthlan hunah Pathian leh mipui zarah Congress an sorkar ngei a rin thu sawiin K Lalchhuanawma chuan, NLUP hmangin kuthnathawktute leh khawpuia khawsak harsate khaichhuak turin hma an la dawn tih a sawi bawk.