Aizawl: Lai Autonomous District Council (LADC)-a CEM designate BJP MDC N. Zangura leh BJP MDC B.N. Thangpuia te’n Guwahati-ah Assam Chief Minister Himanta Biswa Sarma chu a pisaah kawmin, LADC chungchang pawimawh hrang hrang an sawipui.
LADC BJP MDC pahnihte hian, NEDA Convener ni bawk Himanta Biswa Sarma hnenah Guwahati-a Lai Students Hostel sakna tur ram an mamawh thu an thlen a. Assam CM chuan Mizorama ADC pathuma BJP kaihhruai an sorkar vek thei chu, a lawmzia lan tir nan a rang lama MADC, CADC leh LADC tan ram pek an nih tur thu leh tunah pawh a hmun an en mek thu a lo hrilh.
BJP LADC hruaitu N Zangura leh BN Thangpuia te’n Sixth Schedule Amendment pawh NEDA Convener anih ang leh NE State-a pa ber anih angin, a rang lama pass a nih theihna’n an ngen bawk a. Himanta chuan LADC hruaituten a an mamawh an dil te chu theihtawpa a lo puih tur thu leh Central-ah pawh ADC tan a lo sawipui tura a awm thu a hrilh a, harsatna an neih chuan inthlahrung lo va, an mamawhte hrilh thin turin a chah bawk.
LADC BJP MDC pahnihte hi Guwahati-a an cham chhung zawngin BJP National Minority Morcha Secretary, Assam State Minority Prabhari ni bawk Delson Notlia chuan a lo dawngsawng a ni.