Aizawl: Chief Minister Lalduhoma chuan Airport Authority of India (AAI) kuta Lengpui Airport hlan chungchangah, Lengpui Airport zirchiang leha an thu leh hla a zirin an kal zel dan tur sawiho leh turin AAI hotute a chah.
Nimin khan chief minister hian a pisa-ah AAI hotute, Dr. Sharad Kumar, Member (Operations), M Raja Kishore, Regional Executive Director, NER leh an thawhpuite a kawm a. Tun hma atang tawhin AAI kuta Lengpui Airport enkawl hna hlan tuma hmalakna a awm tawh thin chu an ngaihven a, mahse, an beisei angin thil a kal tluan loh avangin Mizoram tana tha tawk tak duhthlan tur dang a awm bawk si avangin, chung mite nena indawrnate an kalpui tih a sawi a. Tun hnaiah Union Home Minister Amit Shah nena an inkawmnaah, AAI nena indawrna thar thawh leh tha an tih hnuah, an indawr thar leh tih sawiin, AAI lamin Lengpui Airport zirchiang leh a, an thu leh hla a zirin an kal zel dan tur sawiho leh turin AAI hotute a chah.
Union Home Minister leh Chief Minister ten AAI kuta Lengpui Airport AAI hlan chungchanga inbiakna thar neih an rel hnuah, April 16, 2025 khan Vanlaldina Fanai, Commissioner & Secretary to CM, GAD chu Delhi ah kalin, Ministry of Civil Aviation Secretary leh AAI hotute nena meeting-a an ruahmanna angin AAI Team te hian Mizoram an tlawh a ni.
AAI hotute hian Lengpui Airport tihchangtlun nghal ngai zual nia an hriat te leh hma an lak zel dan tur te Chief Minister an hrilh nghal bawk.
Chief Minister hi TBC Lalvenchhunga, Adviser to CM, Vanlaldina Fanai, Commissioner & Secretary to CM leh Mizoram civil aviation wing hotuten an tawiawm a ni.