Aizawl: Aizawl-Thenzawl-Lunglei (ATL) road siamna sum dah phuta lungawi lohna lantir mek MZP Hqrs., Lunglei chuan sorkarin duhthlan tur thil chi hnih a pek chu invaunaah ngaiin, Pukpui dai leh Hrangchalkawnga lirthei luh leh chhuahna tur kawng an dan mek chu, tawp mai an la tum lo.
An lungawi lohna lantira MZP Hqrs., Lungleiin Pukpui dai leh Hrangchalkawna kawng an dan avang hian, nimin lamah Siaha leh Lawngtlai lam pan tum bakah Lunglei chhim lam atanga Aizawl lam pan tum lirthei eng emaw zat an dang a ni.
The Zozam Times thudawn danin, MZP Hqrs., Lunglei chuan kawng dan chungchangah Education Minister Dr Vanlalthlana, Adviser to chief minister Lalmuanpuia Punte leh Lunglei North bialtu MLA V Malsawmtluanga ten an biak thu an sawi a. Mahse, an thu thlenin an lungawina a thlen lo tih an sawi a. Sorkarin duh thlan tur a pek chu Central Road Research Institute (CRRI) te’n project an siam hunah, Rs vbc 44.89 aia tam pawh an pe thei a, a daih bak erawh chu sawi theih a nih loh thu an sawi a; a pahnihnaah Rs vbc 44.89 chu pek theih mah se, CRRI te project a siam tir theih loh ang tiin duh thlan tir an tum niin an sawi.
MZP hruaitute chuan, an resolution angin kawng siamna tura sum pawh pen dah let leh chu an thil phut a nih thu leh, CRRI-ten project an siamah an ngaih a ngam lo tih an sawi a. Invauna aw-kaah an ngai tih sawiin, he thu buatsaih a nih lai thlengin kawng hi dan chhunzawm an tum nia thudawn a ni.
Tar lan tawh angin, MZP Hqrs Lunglei hruaitute chuan ATL road, Kanghmun South atanga Pukpui chin siamna tur sum Rs vbc 90.69 a ruahman tawh atangin, Mausen leh Pukpui inkar kawngpui, km 14 chin chauh siam nan Rs vbc 45.60 chauh daha, sum bak zawng Mizoram sorkarin hmun danga a pawt peng nia an hriat avang leh sum pawh pen hi hnukkir tura ni 15 chhung sorkar an nghah hnuah an duh ang chhanna sorkar atanga an hmuh loh avangin kawng an dang a ni.
MZP Hqrs., Lungleiin thil phut neia kawng danga hma an laknaah Lungleia pawl hrang hrangin an thlawp thu an chhuah tawh a. Nimin khan YMA Sub Hqrs., Lunglei pawhin thuchhuah siamin, MZP-ten kawngpui dang chat meuhva an hmana chu ‘Mizoram chhim lam mipui aw’ a ni tih sorkarin hriatsak a, ATL road siam thatna tura NGO hrang hrang ngenna leh hmalaknate na zawka nawr ngai tawh lo turin sorkar hian hma laksak ngei turin an ngen tih an sawi.
Hetih lai hian, April 7, 2025 khan Lunglei West bialtu MLA leh ZPM Southern Hqtrs-in ATL Road bik enkawl tura an dah, T. Lalhlimpuia chuan ATL kawngpui chu ZPM Southern Hqrs anga a mawhphurhna a nih angin, sorkarin a siam dawn lo a nih chuan MLA atanga chawlh a hreh loh thu, party chhung inkhawmah a lo sawi tawh a ni.