Aizawl: MNF President Zoramthanga chuan MNF in hun harsa tawkin hniam takah awm thin mah se, Pathianin a kaihhruaiin a khai chhuak leh thin tih a sawi.
Nimina Mamit Chhim Veng YMA Hall-ah Mamit District chhunga MNF VC tlingte chawimawina hun hmangpuinaah MNF President Zoramthanga chuan Mizoramah party tam tak an ral tawh laiin, MNF chu kum 64 chuang an ni tawh chungin, vawiin thlenga party ruhrel lian ber an la ni thei chu an theihna vang a ni tih sawiin, “Hun harsa tak tak tawkin hniam takah awm thin mah ila, MNF theihna leh chakna vang niloin Pathianin min kaihruaiin min khai chhuak leh thin a ni,” tiin, ‘Pathian leh kan Ram tan’ tih thupui leh thuthlung meichher vuan tlattu party an nihna chu vawng nung zel turin kalkhawmte a chah.
Mizoramah party hrang hrang thli alo tleh tawh thin tih sawiin Zoramthanga chuan, “Pathianin ZPM thli a tlehtir a, an hun atan ruat a ni. Mahse, mi dang sorkar laia mipui zawhna ang a ni ta hauh lo. Congress leh MNF a sorkar lai chuan a dawtah an sorkar leh ang em tiin an inzawt thin a. ZPM sorkarah chuan an term an hmang zo ang em tiin mipui an inzawt mek a ni,” a ti.
He hunah hian Hachhek bialtu MLA Robert Romawia Royte leh Mamit Bialtu MLA Er H.Lalzirliana te pawhin thu a sawi a. Social Media chungchang inzirtirna leh hman tangkai dan J.Malsawmzuala Vanchhawng, GS, MNF Gen. Hqrs chuan a nei a ni.
MNF VC tling 145 bakah hian, tunhnaiah MNF VC siam thar an awm belh avangin, Mamit District-ah MNF VC member 150 an awm mek nia sawi a ni.