Sumdawnna han tih hian inlei leh hralhchhawn a ni ber a. Sumdawng mi riau hi chu an awm ngei mai. Mahse, sumdawng hlawhtling kan tih ho hi an leina leh an hralhna man hrechiang kar hi an ni ber. Mizote hi hnam fir ker kawr, ti thlip thlep em em kan ni lova. Sumdawng hlawhtling tur chuan ti deuh thlep thlawp a ngai si a. Chuvangin sumdawnnaah hian kan sang lo ni deuh berin a hriat.
Amaherawh chu khawvel ei leh bar in mamawh tawn, inher chho zelah hian sumdawng hnam kan ni lo tih ngawt theih a ni lova. Kan hnam hian sumdawnna lam rilru hi kan put chhoh deuh deuh a ngai zel dawn. Kan ram chhung chang ni lova sumdawnga kan tei chhuah ngei ngeite hi a ngai chho dawn a. Kan ram thlai thar tak ngial pawh hlawk zawka hralh dan thiam lo / thei lo nih a, kan thlang vaiho sumdawnna tura ruat ngawtte hi a dik lo.
Kan ramah hian eizawnna kan ngaihtuah dan hi sawrkar behchhana eizawnna a ni tlangpui mai a. Kan pawisa nei deuh ho lah hian sawrkar hnuaia contract works khawih hi an han tum deuh tlangpui ringawt bawk a. Kan ngaihtuahna hi thlak a hun ta hle. Pawisa nei hote, a nei vak lo ho pawh intelkhawma kan ram thlai thar hralhchhuah dan ngaihtuaha phêt ve sek hi a hun ta. Vai ram lamah engtinnge ka hralh ang, khawi state a mite nen nge kan thawhho theih ang tihte pawh hi a dap vetu hi awm fur tawh ila kan ziaawm ang. A bik takin kan thalaite hian helamte pawh hi hawi zau tulh tulh se. Loh theih loha kawmthlang vai kuta innghah hi a hun tawh lova. Keimahni ngei hian eizawn zel nan, sumdawnna atan hmang thiam ila hmasawn kan ni mai.