Aizawl: Mizoram Pradesh Congress Committee (MPCC) Vice President Ronald Sapa Tlau (71), chu nimin zing dar 8 khan AIIMS, Delhi-ah a thi.
Mizoram Rajya Sabha MP hlui ni bawk Ronald Sapa Tlau hi April 6, 2025 khan lunglam that loh vangin Delhi-ah inenkawl turin a kal a, AIIMS ah April 28-a lung zai (open heart surgery) niin, vanduaithlak takin cardiac arrest vangin a thi. A ruang hi vawiin hian Aizawl thlenpui tura ruahman niin, lumen pui anih hnuah a chhenna in, Zonuam, Aizawl-ah Zirtawpni-ah vui tura tih a ni.
Ronald Sapa Tlau hi July 2014 khan Indian National Congress (INC) ticket-in Rajya Sabha MP atan thlan tlin a ni a, July, 2020 thleng MP a ni a. MP-a nih chhung hian Parliamentary Committee on Health & Family Welfare of India, Parliamentary committee on Science and technology leh Parliamentary Committee on Information Technology-ah te a tel bakah ZMC din a nih theih nan tha a thawh bakah Thenzawla Golf Course din a nih theih nan a thawh hlawk hle a. Kum 2009-2013 chhung khan Zoram Electronics Development Corporation Limited (ZENICS)-ah Chairman a ni bawk.
MPCC-ah hian a thih ni thlengin vice president nihna a chelh a, General Secretary (2003- 2008) leh Chairman, Media department; Chief Spokesman (2009-2014) Chairman, Communication department-te pawh a lo ni tawh a ni.
Ronald Sapa Tlau hian a nupui, Ramthanpari Tlau bakah fapa pahnih leh fanu pakhat a kalsan a ni.
MPCC chuan nimin khan Congress Bhavan-ah an vice president sunna hun an hmang a, a sun nan minute khat ngawi rengin an ding a, Congress party puanzar chu a ngul chanvein an zar bawk.
MPCC President Lal Thanzara chuan, “Ram leh hnam tana ka thawhpui, thawhpui nuam leh theihna zawng zawng hlan thin, Pu Ronald Sap Tlau (71), Ex- Rajya Sabha MP leh MPCC-a kan vice president ni mek, nangmah thlahna leh ui thu siam a ngai ta mai hi pawi ka tiin min thawng takzet a ni. He i taksa boralna hian Congress party nasa zawka ram leh hnam tana rim taka thawk turin min tichak thar rawh se,” tiin tawrhpuina thuchah a sawi.
Rajya Sabha-a Leader of Opposition Mallikarjun Kharge, MP, chuan nimin vek khan Ronald Sapa Tlau nupui chu a lusunnaah a tawrhpui thu a thawn a. ZPM General Hqrs., pawhin tawrhpuina thuchhuah an siam bawk.