- Lalrintluanga
Mizote hi hnam chapo ve tak, nihna duh leh nihna ngaisang tak hnam kan ni ve in a lang a. Engineer te zingah pawh Mizo tluka hming bula Er dah tam hi kan awm ang em aw ka ti. Vai zingah hian an dah uar vak lo nge ni, hmun khatah deuh chiah an dah ka la hmu. Architect te zingah Ar an dah phei chu hmun dangah hian ka la hmu ngai lova, Advocate ho zinga Adv dah phei chu kan hre tam lo khawp mai. Mizo zingah chuan a rem leh rem lova title hrang hrang dah hi kan tam viau awm e. Pastor ho phei chuan Rev hi damchhungin an dah a, khawvel thilah pawh kan ziak deuh ta zel mai. Hming tawpa ‘S’ dah pawh hi pension tawh (retired) ho zingah hian kan uar viau niin a lang. Hengte hian Mizo te hi nihna duh, nihna lawm tak kan nih zia a tarlang chiang viau awm e. Mizo zingah hian tun hnaiah hian hming bula Dr dah thei hi kan pung ta hle mai a. PhD ti zo kan pung a, MBBS zir zo thar kan pung a, Dental doctor lam kan pung a, Vety lam atanga dah thei kan pung zel a, Physiotherapy lam thleng te pawh hian Dr kan dah ve ta zel a. Pastor zingah leh Pastor ni chiah loah pawh Pathian thu lama doctor title dah thei kan pung ta hle mai. A lehlamah chuan hmasawnna ken tel te pawh ti ila a sual lutuk awm love, chutihrualin phu lem lo leh ril lutuk lo thleng hian kan dah fir fer mai awm mang e tih theih a ni.
Tun hnaiah hian honorary doctorate degree nei ka pung ta deuh a ni awm a, kan phu vang ai mahin a thente hi chuan he degree hi a lei a lei theih deuh hian a lang deuh roh avanga nei kan ni mai ang em? Social media velah hian doctorate nomination tih theihte hmuh tur a tam hle mai a. A lei a lei anga lang chiah lo, mahse thilpek anga kal tirin mi tam tak chuan heng atang hian honorary doctorate hi kan lei mek niin a lang. Heng degree pe theite hi University lem deuh deuh leh University pawh ni chiah lo, hming phuahchawp lutuk atanga degree dawng hi kan awm ve ta fo ang em? A dik tak chuan mi thenkhat hi chu mahni hnathawh that leh thiamna lamah chuan mi chhuanawm tak zawng an ni ngei ang. Mahse, Mizo zingah pawh mi hmingtha leh officer lal deuh deuh heng degree hum hnawk tum lo hi kan tam a. Chutih laiin rem leh rem lova Dr dah talh tum erawh kan pung zel ni te pawh hian a lang.
Honorary Doctorate neih a, hming bula Dr dah chungchangah hian mi tam tak ngaihdan pawh a in ang viau lo. University thenkhat hi chuan Honorary Doctorate degree an pek hian a kaihhruainaah a theih hram chuan hming bulah Dr tih hi dah kher loh nise tih te pawh an tarlang tel ve thin. Mi chungchuangte tana pek, mi hmingtha leh a phu ngawi ngawih te hnena pek thin a ni. Mahse, Dr tih hi dah kher lo turin an chah thin a, mi tam tak hi chuan an dah zui lo ni te pawh hian a lang. India ram President lar tak, APJ Abdul Kalam kha bachelor degree thleng chauh zir a ni a. A ni tluka Honorary Doctorate dawn phu leh dawng nasa kha an awm kher awm love. A dawnna lah kha University tha leh lar deuh hlir a ni. A ni kha Dr APJ Abdul Kalam tih a koh a ni a. A in dah aiin an dah sak a nih a rinawm a. Tin, Dr Manmohan Singh kha PhD ngat a ni a, a ni kha chu tun hma atanga a lo put tawh a nih avangin Dr a dah tlang a ni ngei ang. Mi thenkhat chuan Doctor tih vel dah hi an buaipui viau lo khawp mai a. Kan Prime Minister ni mek Narendra Modi hian kum 2016 khan Banaras Hindu University atangin Doctor of Law degree an pek tum chu a lo hnawl tawh zawk a ni. Rem leh rem lova, phu vak lo ten Dr tih man chawia an lei, lem deuh deuh kan dah hram nen chuan in ang lo tak chu a ni.
Mizo zingah hian Pathian thu lamah D.Th (University thenkhat chuan PhD in a kal a) hi zir dan phung leh kalphung pangai deuh a zir a ni a, a zir chhunga pawh a rei deuh. Hei zet hi chu Doctorate puitling kan tih ang kha a ni awm e. Tun hnaiah hian Doctor of Ministry kan tih hi a awm leh a, hei hi chu full time zir a ni ve lem lova, rawngbawl paha an zir a ni a, hei pawh hi bei ve fe chu a ngai awm e. Tin, heng bakah hian Theological college pangai tak, heng Senate of Serampore tih ang ten an pek Doctor of Divinity hi a awm leh a. Kan Mizo Pathian thu thiam zingah pawh dawng an tam ve ta viau mai a, a lawmawm hle mai. Hetih lai hian University pawh ni lo, college thenkhat hian PhD Course leh Honorary Degree hi an pe ve nual a. A then te chu sumdawnna atan hmang te pawh hi an tam viau awm e. Kan Doctorate degree lakna tam tak hi college zawm mumal nei lo, pawmtu nei vak lo te pek hi a ni nual ang em aw ka ti thin.
A thiam leh thei te chawimawi hi Bible pawh hian thu min pek a ni a, mahse mi tam tak hi chuan mahni inchawimawi nan, hmingthatna atan hian khawi lai vel atang hian Doctorate hi kan lei in kan dah vel niin a lang. Rem leh rem lova dah tlar tuar hi kan la lawm hle a. Rev karah Dr dah tel hram te, Upa kara Dr dah tel hram te, ka hming tawp lamah ‘S’ dah duh bawk hming hma lam Dr dah duh bawk te hi kan kat nuk ni hian alang. Kan hna in a ken tel ni miah lo, kan lalna leh hmingthatna chhuanlam deuh Dr dah tum pawh kan pung zelin a rinawm.
Kan phu tak zet a, University pangngai takin in honorary doctorate degree min pe a nih chuan a lawmawm hle mai. Chutiang pawh ni lo, khawi lai University nge tih pawh hriat loh, mi zinga pawh kan sawi zak deuh roh tur atanga degree neih te hi a hlu miah lo. Tin, certificate pawh kan tar ngam lohna tur vela Doctorate degree neih hi chu i ngaihlu in i thlahlel lovang u. Mi tam tak chuan PhD tiin rim tak leh hrehawm takin an rawn zir chhuak a, MBBS zirlai in rilru hah reng reng in rim taka an rawn zir chhuah ang hi pension tawh hnu, kan hnathawh man zawng zawng kan dawn tawh hnu vela rem leh rem lova neih ve ngawt hi i tum tal lo teh ang u. Mi hian min ngaisang tak tak chuang lo. Tin, Pathian thu lamah phei chuan zirna lama kan dawng a nih loh phei chuan i thlahlel vak lovang u. Vanah heng degree aia hlu hi kan nei tih hria in Van lawmman min pek tur hi i ngaihlu zawk teh ang u.