Aizawl: National Commission for Scheduled Tribes (NCST) Chairperson Antar Singh Arya chuan Hindi zir leh ngaih pawimawh tul nia a hriat thu a sawi.
NCST Full Commission Mizoram lo zin mek te chuan nimin khan Mizorama Scheduled Tribe-te dinhmun, an dikna leh chanvo leh an tana scheme hrang hrang hnuaia hmalakna te thlirletna hun neiin, Mizoram sorkara thuneitute nen Secretariat Conference Hall-ah an thukhawm a. He hunah hian commission member awm zawng zawng mi pathum – Nirupam Chakma, Dr. Asha Lakra leh Shi Jatothu Hussain te pawh an tel.
He hunah NCST Chairperson Arya chuan Mizorama Hindi zir leh ngaih pawimawh tul nia a hriat thute sawiin, Mizoram Hindi medium school hawn dawn kawng zawn a duh thu a sawi a. Tlangram loneih dan bansan nan project siam nise tia rawtna siamin, Mizoram sorkar hotulu kalkhawmte tribal an nih angin an tribalpui leh hnampuite hmasawnna atana theihtawp chhuah turin a fuih.
NCST Member Nirupam Chakma chuan Mizoram mipui zinga NCST hnathawh dan leh ST te tana hma an lak theih hria an tam lo nia a hmuh thute a sawi a. Hemi kawngah hian tan lakna tur a awm niin a sawi bawk.
He hunah hian Dr. Asha Lakra bakah Chief Secretary Khilli Ram Meena te pawhin thu an sawi.
Hemi hnu hian NCST hotute chuan thu thar thehdarhtute an kawm nghal a. He hunah hian ADC pathum – CADC, MADC leh LADC te an tlawh thu te, heng ADC huam chhunga sorkar hmalakna an zirchianna chungchangte an sawi a. Mizoram sorkar department hotute nena an inkawmna chungchang leh an ngaih pawimawhte an sawi bawk.