Aizawl: Industrial Growth Centre (IGC), Luangmual leh Export Promotion Industrial Park (EPIP), Lengte ram huam chhunga dan lova ram luahtute leh dan anga hmunhma pek, pek ang ni lova hmangtute chungah Mizoram sorkarin hma la dawn.
Nilaini khan Commerce & Industries Department leh Land Revenue & Settlement department pahnih hotute chuan Industries Minister F Rodingliana leh Revenue Minister B Lalchhanzova te kaihhruaiin joint meeting an nei a. He thutkhawmah hian IGC leh EPIP huam chhunga dan lova ram luahtute leh luah tura phalna neite pawhin ruahmanna awmsa anga an luah loh chungchanga thu rel tawh thlir letin, hmalak chhunzawm dan turte an sawi ho.
Minister F Rodingliana pisa-a thutkhawmah hian, dan lova industry ram luahtute chu hriattirna (show cause notice) pek ni se, thupek zawm lote chu ‘The Mizoram (Land Revenue) Act 2013,’ Section 101-na behchhana pawisa chawi tir tura hrem theih a nih dan te, Revenue dana hmunhma pek, pek ang ni lova hmangtute chu Rs. 10,000 thleng chawitir theih a nih thu leh, thupek an zawm loh luih zel chuan ni tin Rs. 5,000 chawitir theih a nih thute sawi lan a ni.
Industries Minister F. Rodingliana chuan industry ram, a bikin IGC, Luangmual leh EPIP, Lengte bakah Industrial Estate, Zuangtui ram nek avangte, dan lova luah luitute avangte leh phalna leh ruahman ang (allotment pek) ni lova hmangtute chu insaseng turin sorkarin hun thahnem tak a pek chung pawha, thupek zawm duh lo an la awm thu a sawi a. Ram tihhmasawn nan leh thalaite eizawnna siamna hmun tur heng industry ramte hi a nihna tur ang taka hman tangkai a nih theih nan hma chak taka lak chhunzawm tur a nih thu a sawi.
Revenue Minister B. Lalchhanzova pawhin Commerce & Industries ram buai chinfelna turin theihtawp a chhuahpui tur thu a sawi a. Hmalakna awmze nei leh sawt zawk a kalpui a nih theih nan department pahnihte tanrualna a pawimawh thu a sawi a, thawktute chu minister te tel kher lo pawha inrawntawna hma la turin a chah bawk.