West Bengal khawpui, Kolkata lailia khualbuka kangmei chhuakah mi 14 vel an thi tih Thawhlehni khan police-in an sawi.
He chhiatna hi zing dar 08:15 vela Rituraj Hotel-a thleng niin Kolkata Police Commissioner Manoj Kumar Verma chuan thelh mih a ni tawh tih thuthar lakhawmtute hnenah a sawi.
“Ruang 14 hmuh a ni a, mi thahnem tak chhanchhuah an ni bawk a. A chhui turin special team din nghal a ni,” a ti.
Kangmei chhuah chhan hi chiang taka hriat theih a la ni lo.
Union minister, an state-a BJP president ni bawk, Sukanta Majumdar-a chuan state thuneitute chu chhanchhuah hna thawk chak turin a nawr hmanhmawh a. Kangmei laka himna tura dan zam chu ni dang zelah chhiatna a thlen tawh loh nan ‘kengkawh khauh turin’ a ngen bawk.
“State thuneitute chu a tuartute chhanchhuaka an himna pe tur leh damdawia an inenkawlna pawh tumsak turin ka ngen a, puihna awm thei ang pawh ngaituahsak turin ka ngen a ni,” a ti a. “Hetiang hi nakin zela a thlen tawh loh nan a venna lam pawh ngaihtuah tha se, kengkawh tha se ka ti,” tiin X-ah a tar lang.
West Bengal Congress President Subhankar Sarkar-a chuan Kolkata Corporation a dem thu a sawi a. “In chhungah mi tam tak an tang a, himna a awm lo, corporation hian eng nge an tih pawh ka hre lo,” a ti.