Aizawl: Mizoram Police hnuaia CID (SB) chuan Zemabawk North Presbyterian Biak In bulah lrithei pahnih atangin methamphetamine mum kg 47.511 an man.
An thudawn bawhzuiin CID (SB) chuan, April 29, 2025 zingkar atangin Tuirial leh Zemabawk inkarah operation an nei a. Champhai atanga Aizawl pan mek lirthei pahnih chu chawhma dar 11:30 khan Zemabawk North Presbyterian biak in bulah lo tidingin, uluk taka an enfiah hnuah KIA Seltos car (MZ 01 AD 6157), T. Vancheuliana (37), Champhai Vengthlang khalh atangin meth mum tel 20, a belhkhawma kg 18.939 an man chhuak. Meth hi lirthei body lining leh dashboard beam chhunga char hnan a ni.
Lirthei pakhat zawk, KIA Sonet car (MZ 01 AC 3237), Samuela (38), Champhai Vengthlang khalh atangin meth mum tel 29, a belhkhawmin kg 28.572 an man bawk. Meth hi lirthei body lining leh dashboard beam chhunga char hnan a ni.
Meth man belhkhawm hi kg 47.511 niin, Rs vbc 6.176 man hu nia chhut a ni.
Heng ruihhlo, a phurhna lirthei leh a khalhtute nia puhte hi dan hnuaiah man nghal an ni a, Special Narcotic PS (SNPS) kutah hlan an niin thubuai ziah luh a ni.